ئەندامەکی ئەنجوومەنا نشتمانیا کورد ل سووریێ (ئەنەکەس)ێ ل سینۆرێ باژارێ قامشلۆیا رۆژئاڤایێ کوردستانێ ھات کوشتن و ھەتا نھا ھوورگلیێن بوویەرێ ئاشکەرا نەبوونە، لێ رێڤەبەرەکی ئەنەکەسێ ئاشکەرا کر کو ئەندامێ وان رۆژا پێنجشەمبا ھەفتیا بۆری ھاتبوو رەڤاندن.
ل گۆر زانیاریان ئیرۆ 20/1/2025 ل باژارۆکێ تربەسپی ل رۆژھلاتێ باژارێ قامشلۆ کەسەک ب ناڤێ ئیسماعیل فەتاح کو ئەندامێ ئەنەکەسێ یە، ب ئاوایەکی ب گومان ھاتیە کوشتن.
ڤێ دەربارێ دە یەک ژ ئەندامێن رێڤەبەرا ئەنەکەسێ ئەسمەھان داوود راگەھاند: “مخابن ئیرۆ بەر ب سبەھێ ڤە کادرۆ و تەکۆشەرێ کەڤن ئیسماعیل فەتاح پشتی کو ھاتیە کوشتن تەرمێ وی ئاڤێتنە جیھەکی. ئەو ئەندامەکی ناڤخوەیێ ئەنەکەسێ بوو ل قامشلۆ و رۆژا پێنجشەمێ ھاتبوو رەڤاندن. وێ دەمێ کو ھاتە رەڤاندن، وان گۆتن مە پرس کریە لێ ل گەل مە نینە، وەک ھەسەدە، مەسەدە و پەیەدە. دەما ژ گرکێ لەگێ ڤە خوەستیە بێ بۆ قامشلۆ ل وێ دەرێ ھاتیە رەڤاندن. مە وەک ئەنەکەسە بەیانامە دەرنەخستن، ژ بەر کو مە دخوەست رزگار بکن.”
ھەروھا گۆت، تەرمێ وی ئەندامێ وان نھا ل پزیشکیا داد یا قامشلۆیە.
ئەسمەھان داوود گۆت، ئەو ئەندامێ وان چەند جارەکێن دن ژ ئالیێ گرووپێن رۆژئاڤایێ کوردستانێ ڤە ھاتبوو گرتن، ژ بەر کو یەک ژ وان کەسان بوو بەردەوام رەخنە ل سیاسەتا پەکەکێ یا ل رۆژئاڤایێ کوردستانێ دکر.
بەردەڤکێ ئەنەکەسێ فەیسەل یوسف ژی راگەھاند: “بەلێ مخابن تەرمێ مامۆستا ئیسماعیل فەتاح ھاتیە دیتن و ھاتیە کوشتن. مە داخواز کر کو کەسەک وی نەڤەشێرە ھەتا لژنەیا لێکۆلینێ ئاڤا ببە و سەدەمێ کوشتنا وی دیار ببە.”
د وان دەمێن داویێ دە ھەولدانێن بەرفرەھ ژ بۆ یەکتی و یەکرێزیا کوردان ل رۆژئاڤایێ کوردستانێ تێن دایین و ڤێ چارچۆڤەیێ دە سەرۆک بارزانی ل گەل فەرماندارێ ھەسەدێ مەزلووم عەبدی جڤیا و ھەروەھا گەلەک جڤین د ناڤبەرا ئالیێن رۆژئاڤایێ کوردستانێ دە برێڤە چوون.
