رێڤەبەریا خوەسەر: بلا ھێزەکا ناڤنەتەوەیی دەرباسی بەنداڤا تشرینێ ببە
رێڤەبەریا خوەسەر ب داخویانیەکە نڤیسکی بانگی گەلێن سووریەیێ و جڤاکا ناڤنەتەوەیی کر و گۆت، “ئێرشێن دەولەتا داگرکەرا ترکیەیێ و چەتەیێن وێ راوەستینن. بلا ھێزەکە ناڤنەتەوەیی دەرباسی بەنداڤا تشرینێ ببە.”
رێڤەبەریا خوەسەر د داخویانیا خوە یا نڤیسکی دە هەر وەها رگهاند، ئێرشێن چەکدارێن “ئارتێشا نشتمانییا سووریەیێ”یا نێزکی ترکیەیێ یێن ل دەردۆرا پرا قەرەقۆزاقێ و بەنداڤا تشرینێ بەردەوام دکن.
داخویانیا نڤیسکی یا رێڤەبەریا خوەسەر وھایە:
“وەکی ھوون دزانن پشتی ھلوەشینا سیستەما رەژیما بەعسی یا ل سووریایێ پێڤاژۆیەکا نوو دەست پێ کر، ئەڤ پێڤاژۆ ژی ژ ئەنجاما 14 سالان ژ بەرخوەدانا گەلێ سووریەیێ بوو.
د ڤان 14 سالێن بۆری دە گەلێن سووریەیێ د زۆر و زحمەتیێن گەلەک ب ئێش و ئازاران رە دەرباس بوون.
ژ کۆچبەریا ب دارێ زۆرێ بگرە ھەیا خرابیا رەوشا ئابۆری و ھەری داوی داگیرکەریا دەولەتا داگیرکەرا ترکیەیێ.
ب ھلوەشینا سیستەما بەعس گەلێن سووریەیێ ل بەرامبەری چەرخەرێیەکێ نە، د ڤێ چەرخەرێیێ دە پر رێیێن جودا ھەنە.
د ڤێ پێڤاژۆیێ دە گەلێن سووریەیێ ب ھەڤ رە و ب یەک دەستی دکارن سووریەیەکا نوو و دەمۆکرات ئاڤا بکن.
ھێزێن سیاسی، پارتی، رێخستن و تەڤگەرێن سیاسی و جڤاکی ب نیقاش و دانووستاندنێن ناڤخوەیی دکارن دەستوورەکا ھێژا و وەکی پڕەنگیا گەلێن سووریەیێ ساز بکن.
لێ بەردەوامکرنا ئێرشێن دەولەتا داگیرکەر و چەتەیێن گرێدایی وێ، ئالۆزیا سووریەیێ گەش دکە. ناھێلە کو گەلێ سووریەیێ د رەوشەکە ئارام دە بژی.
ناھێلە سووریە د کەشەکە ئازاد دە دەستوور و پاشەرۆژا خوە دیار بکە. لەورا ئەڤ ئێرش جڤاکا سووریەیێ ب قاسی کو ھاتیە تاروومارکرن، ئەو پێتر پەرچە دکە.
ژ خوە ئەم وەکی ئەنجوومەنا ژینگەھێ یا باکوور و رۆژھلاتێ سووریایێ ئێرشێن دەولەتا داگیرکەرا کو ب بالافرێن بێمرۆڤ و بالافرێن شەر کو ئێرشی بەنداڤا تشرینێ دکە شەرمەزار دکن.
ژ بۆ پاراستنا بەنداڤێ ئەم وەکی گەلێن باکوور و رۆژھلاتێ سووریایێ ئەڤ ژ 8 مەھن کاروانێن سڤل بەرێ خوە ددن بەنداڤێ و وەکی مەرتالەکی زندی ب یەک دەستی بەنداڤێ دپارێزن لێ دیسا داگیرکەریا ترک نەراوەستیایە.
ژ خوە ئێرشی سڤیلان کر و ب دەھان شێنییێن سڤیل شەھید کەتن. ھین ژی ئەڤ ئێریش بەردەوامە.
بانگا مە د سەری دە ژ گەلێن سووریەیێ تەڤی رە ب کورد، عەرەب، سوریان، چەرکەز، عەلەوی، دورزی، مسلمان و ئێزدیێن خوە کو ل ھەمبەری ڤان ئێرشێن ل سەر بەنداڤا تشرینێ راوەستن و داکەڤن قادان و دەنگێ خوە بگهینن قادێن ناڤنەتەوەیی، ژ بەر خەرابکرنا بەنداڤێ دێ کارەسەتەکە مرۆڤی ب خوە رە بینە.
د ھەمان دەمێ دە ژی بانگا مە ژ تەڤگەرێن ژینگەهێ، رێخستن و سازیێن مافێن مرۆڤی رە ھەیە. خەتەریا ل سەر بەنداڤێ ھەر رۆژ پر دبە، ئەڤ خەتەری دێ ب خوە رە فەلاکەتێن جودا دەرخە ھۆلێ.
ئەڤ ئێرش نە تەنێ زەرەرێ ددن خوەزایا ھەرەمێ، گەلێ وێ ژی د قرکرنێکێ رە بتەحلووکە رە دەرباس دکن.
رۆژانە شەھادەت و بوویەرێن کو ژینگەھ تێ تاروومارکرن دقەومن. ژ خوە تەیر و تلوور و لاور ژ ھێلینێن خوە کۆچبەر بوونە. لەورا خەتەریێن کو دەرکەڤن، ئەڤن:
ل دەردۆرا بەنداڤێ ب سەدان گوند و ب سەدان ھەزار شێنی دژین، رووخاندنا بەنداڤێ دێ فەتساندنا ئەو قاس مرۆڤان و خەرابکرن گەلەک گوندان ب خوە رە بینە.
دێ ب خوە رە فەلاکەتەک ئەکۆلۆژیک بینە کو ھێلین و جھێ ب ھەزارا جوورەیێن زندیان خەرا بکە و سیستەما ئەکۆلۆژیک ل وێ دەڤەرێ خەرا بکە. د ئەنجاما خەراکرنا بەنداڤێ دە شینکاھی و ب ملیۆنان زندی دێ هێن تونەکرن.
بەنداڤ ب سەدان ھەزار گوند و باژارۆکان ب ئەلەکتریک دکە. خەرابکرنا وێ سووریەیێ دخە رەوشەکە زەحمەت و سەردەمەکە تاری.
بەنداڤ د ھەمان دەمێ دە ژی پرەکە کو چوون و ھاتنا شێنیێن ھەرێمێ ھێسان دکە. ژ لەورا ژی ئەڤ رەوشا ئێرشکرنێ ژیانێ تەنگاڤ دکە.
ژ بەر وێ داخوازا مە ژ گەلێن سووریەیێ و ھێزێن ناڤنەتەوەیی و رێخستنێن کو مە ل ژۆر بانگی وان کر ئەڤە:
1- ئێرشێن دەولەتا داگیرکەرا ترکیێ و چەتەیێن وێ راوەستینن.
2- ھێزەکا ناڤنەتەوەیی دەرباسی بەنداڤێ ببە.
3 – ئەم جارەکا دن بانگی ھێز، رێخستن، تەڤگەر و کەسایەتێن ناڤنەتەوەیی و مرۆڤی و ئەکۆلۆژیک دکن کو دەنگێ مە بگهینن رایا گشتی کو ئەڤ ئێرش راوەستن.
ئەم بەرخوەدا تەکۆشەرێ ئازادیێ و دەمۆکراتیێ یا هەسەدێ و یەپەژێ سلاڤ و پیرۆز دکن.
ژ برینداران رە شفایا عاجل و ژ مالباتێن پاکرەوانێ ئازادیێ رە سەرساخیێ دخوازن.
شەھید نامرن
بژی سووریەیا دەمۆکراتیک
بژی سووریەیا ئازاد
بژی بەرخوەدانا باکور و رۆژھلاتێ سووریەیێ.”
