پەسەندکرنا یاسایەکێ ژ بۆ ھلوەشاندنا بریارێن سەرکردایەتیا بەعس یا ژ بۆ دەستەسەرکرنا زەڤیێن چاندنیێ یێن جۆتکارێن کورد، تەنێ پرسگرێکێن %35 ژ وەلاتیێن کورد چارەسەر دکە.
دوھ ل پارلامەنتۆیا ئیراقێ پرۆژەیاسایا هەلوەشاندنا بریارێن سەرکرداتیا بەعس و ڤەگەراندنا ملکێن داگیرکری بۆ خوەدیێن وان یێن رەسەن ھات پەسەندکرن، ل گۆری وێ ژی 350 ھەزار دۆنم ئەرد ژ بۆی خوەدیێن وان تێن ڤەگەراندن.
ژ بلی وان 350 ھەزار دۆنمان، هێژ میلیۆن دۆنمێن دن ژ زەڤیێن چاندنیێ یێن کو ل پارێزگەھا کەرکووکێ کو %65 ژ ئەردێن داگیرکری یێن وەلاتیێن کورد و ترکمەنێن پارێزگەھا کەرکووکێ نە، ھەتا نھا بێ چارە مانە.
د ڤێ دەربارێ دە، سەرۆک بارزانی دوھ 21ێ چلە ل سەر جڤینا پارلامەنتۆیا ئیراقێ و دەنگدانا ب پرۆژەیاسایا ڤەگەراندنا ئەرد و زەڤیان ژ بۆ خوەدیێن وان یێن رەسەن ل دەڤەرێن کوردستانی یێن دەرڤەیێ ئیدارەیا ھەرێما کوردستانێ، پەیامەک ل سەر حسابا خوەیا تۆرا جڤاکییا “X” پارڤە کر.
سەرۆک بارزانی د پەیاما خوە دە دبێژە، “بریارا ئەنجوومەنا نوونەرێن ئیراقێ دسەلمینە کو، ئەگەر دادی بەردەوام بە ئاڤەدانکەرە، ئەگەر زلم بەردەوام بە وێرانکەرە.”
ژ ئالیێ خوە ڤە، جیگرێ سەرۆکێ ئەنجوومەنا نوونەرێن ئیراقێ شاخەوان عەبدوللاھ ژی راگەھاند، “پشتی 50 سالان ژ داگیرکرنێ و 20 سالان ژ نەمانا رژێما بەعس، دەنگ ل سەر پرۆژەقانوونا ڤەگەراندنا ئەرد و زەڤیان ژ بۆ خوەدیێن وان یێن رەسەن ھات دان.”
