دەستەیا سەرۆکاتیا ئەنەکەسێ پێشوازیێ ل داخویانیا وەزیرێ حکوومەتا دەمکی یا سووریەیێ دکە و دبێژە، “رێزگرتنا ل مافێن ھەموو پێکھاتەیان و مسۆگەرکرنا بەشداربوونا وان یا دادمەند د دارشتنا پێشەرۆژا وەلاتی دە، باشترین رێیە ژ بۆ بلندکرنا یەکیتیا نیشتیمانی و بدەستخستنا ئارامیێ ل سووریەیێ.”
وەزیرێ دەرڤەیێ حکوومەتا دەمکی یا سووریەیێ ئەسعەد شەیبانی ئیرۆ داخویانیەک ب کوردی ل ھەژمارا خوە یا تۆرا جڤاکی یا “X” بەلاڤ کر و تێ دە گۆت: “کورد ل سووریێ جوانی و رۆناھیێ ل جھێرەنگیا گەلێ سووریێ زێدە دکن. جڤاکا کورد ل سووریێ ژ ئالیێ رەژیما ئەسەد ڤە راستی نەحەقیێ ھات. ئەم دێ ب ھەڤ را وەلاتەکی ئاڤا بکن کو ھەر کەس تێ دە هەست ب وەکھەڤی و عەدالەتێ بکە.”
دەستەیا سەرۆکاتیا ئەنجوومەنا نیشتیمانی یا کوردی ل سووریێ (ئەنەکەس)ێ د داخویانیەکێ دە، پێشوازی ل گۆتنێن شەیبانی کر و راگھاند، “ئەم پێشوازیێ ل ڤێ پێنگاڤێ دکن، کو ب ئاوایەکی ئەشکەرە بوونا سووریەیێ وەکە دەولەتەکا پر ئەتنیکی و پر ئۆلی نیشان ددە.”
ھەروھا گۆت: “ئەم تەکەز دکن کو راکرنا نەحەقیان ل سەر گەلێ کورد و دابینکرنا مافێن وی یێن دەستووری، بنگەھا ئاڤاکرنا سووریەیەکا دەمۆکراتیک، پرئالی، ئارام و پێشکەتییە.”
ئەنەکەسە تەکەز دکە، “رێزگرتنا ل مافێن ھەموو پێکھاتەیان و مسۆگەرکرنا بەشداربوونا وان یا دادمەند د دارشتنا پێشەرۆژا وەلات دە، باشترین رێیە ژ بۆ بلندکرنا یەکیتیا نیشتیمانی و بدەستخستنا ئارامیێ ل سووریەیێ.”
