سەرۆکوەزیرێ هەرێما کوردستانێ مەسروور بارزانی ئیرۆ 23ێ چلەیێ ل داڤۆسێ ب وەزیرێ دەرڤەیێ سووریەیێ ئەسعەد شەیبانی رە جڤیا.
د هەڤدیتنێ دە، رەوشا گشتی یا سووریەیێ، پێشخستنا پەیوەندیێن دوئالی و پێشهاتێن داوییێن ل هەرێمێ هاتن گۆتووبێژکرن.
وەزیرێ دەرڤەیێ سووریەیێ کورتەیەک دەربارێ رەوشا نوو یا سووریەیێ و هەولێن رێڤەبەریا نوو ژ بۆ ڤەگەراندنا ئەولەهی، ئارامیێ و پێشکێشکرنا خزمەتگوزاریێن گشتی ژ وەلاتیێن خوە رە، پێشکێش کر.
شەیبانی گۆت ژی: «کورد، خوشک و برایێن مەنە و پێکهاتەیەکە گرینگ و رەسەنا سووریەیێیە و ئەم پشتراستیێ ددن کو مافێن وان بێن پاراستی بن».
وەزیرێ دەرڤەیێ سووریەیێ، سەرۆکوەزیرێ هەرێما کوردستانێ ژی ڤەخوەند شامێ و گۆت: «ئەم هێڤیدارن کو د دەمەکە نێزیک دە وە ل شامێ ببینن».
سەرۆکوەزیر مەسروور بارزانی تەکەز کر، پاراستنا ئەولەهی و ئارامیێ ل سووریەیێ ژ بۆ مە پر گرینگە و ئەم ئامادەنە هەموو پشتگری و ئالیکاریا پێویست بدن خوشک و برایێن خوەیێن ل سووریەیێ.
هەر دو ئالی ل سەر پێویستیا پاراستنا مافێن هەموو پێکهاتەیان سووریەیێ و د ناڤ دە ژی گەلێ کورد، هەڤنێرین بوون.
د بەشەکە دنا ڤێ هەڤدیتنێ دە، هەولێن سەرۆک بارزانی یێن ژ بۆ نێزیککرنا ئالیێن کوردی و پاراستنا ئەولەهی و ئارامیا سووریەیێ بلند هاتە نرخاندن.
