فەرماندارێ گشتی یێ ھێزێن سووریا دەمۆکراتیک (ھەسەدێ) مەزلووم عەبدی دبێژە: “رزگارکرنا کۆبانێ نە تەنێ سەرکەفتنەکا لەشکەری بوو، بەلکوو گوھەرتنەکا ستراتەژیک و سەمبۆلیک یا ئازادی، روومەت و یەکیتیێ بوو.”
فەرماندارێ گشتی یێ ھەسەدێ مەزلووم عەبدی د دەھەمین سالڤەگەرا کۆبانێ دە پەیامەک ل تۆرا جڤاکی “X” بەلاڤ کر و تێ دە گۆت: “د سالڤەگەرا رزگارکرنا کۆبانێ ژ رێخستنا تەرۆریستا داعشێ دە، ئەم ڤێ سەرکەفتنا مەزن ببیر تینن کو ب قوربانیدانا لەھەنگ و قەھرەمانان ھات بدەستخستن و بوو ھێڤیەک ژ بۆ ھەموو گەلێ سووریێ.”
مەزلووم عەبدی تەکەز دکە، “رزگارکرنا کۆبانێ، نە تەنێ سەرکەفتنەکا لەشکەری بوو، بەلکو گوھەرتنەکا ستراتەژیک و سەمبۆلیک یا ئازادی، روومەت و یەکیتیێ بوو.
ھەروھا گۆت: “ئەم د تێکۆشینا خوەیا ل دژی تەرۆرێ دە، د چارچۆڤەیا ھەڤکاریا مە یا د ھەڤپەیمانیا ناڤدەولەتی دە بەردەوامن، د ھەمان دەمێ دە ئەم دخوازین سووریەیەکا ئەولە و ئارام ئاڤا بکن. ئەم دێ رێیا سەرکەتنێ یا کو مە ژ کۆبانێ دەست پێ کریە، بەر ب پێشەرۆژەکا باشتر یا گەلێ خوە ڤە بدۆمینن.”
د ئیلۆنا 2014 دە چەکدارێن داعشێ ب تەڤاھیا کارینێن خوە ئێریشی سەر ھەرێما کۆبانێ کرن. د دەستپێکا دە، داعشێ دۆرا 350 گوندێن کۆبانی کۆنترۆل بکن کو د ئەنجامێ دە نێزیکی 400 ھەزار کەس دەربەدەر بوون و بەرێن خوە دان باژارێن باکورێ کوردستانێ.
سەرۆک مەسعوود بارزانی بریارا پشتەڤانیا کۆبانێ دا و ل سەر فەرمانا وی، پارلامەنتۆیا کوردستانێ رۆژا 22 جۆتمەھا 2014 بریارا شاندنا چەک و پێشمەرگە ژ بۆ کۆبانی دا. ھێزێن پێشمەرگە ژی ژ ھەرێما کوردستانێ دەرباسی باکورێ کوردستانێ بوون، ژ ور ڤە ژی رۆژا 28 جۆتمەھا 2014 دەرباسی کۆبانێ بوون و دەستدەک دان بەرەڤانیا ل کۆبانێ.
پێشمەرگە و ھێزێن کوردی دۆرپێچا ل سەر کۆبانێ شکاندن و کارین باژارێ کۆبانێ و ھەژمارەکە مەزن ژ گوندێن دەردۆرا وێ ژ دەستێ داعش ب تەمامی دەرخن و د 26 چلەیا 2015 دە سەرکەفتنا خوە راگھاندن.
