ئیرۆ 26ێ چلەیا 2025ێ سالڤەگەرا رزگارکرنا باژارێ کۆبانێ یێ رۆژئاڤایێ کوردستانێیە، کو د سالا 2014 دە راستی ئێریشەکا توند یا داعشێ ھاتبوو و بەشەک مەزن ژ وێ ھەرێمێ ھاتبوو داگیرکرن.
د ئیلۆنا 2014 دە چەکدارێن داعشێ ب تەڤاھیا کارینێن خوە ئێریشی سەر ھەرێما کۆبانێ کرن. د دەستپێکا دە، داعشێ دۆرا 350 گوندێن کۆبانی کۆنترۆل بکن کو د ئەنجامێ دە نێزیکی 400 ھەزار کەس دەربەدەر بوون و بەرێن خوە دان باژارێن باکورێ کوردستانێ.
ئێریشێن داعشێ رۆژ ب رۆژێ زێدەتر دبوون و رووبەرا کۆنترۆلا وان ژی بەرفرەھ دبوو و ھەول ددان خوە بگهینن ناڤەندا باژارێ کۆبانی.
ژ بەر کێمبوونا کارینێن ھێزێن یەپەگێ ل کۆبانێ د وێ دەمێ دە و زێدەبوونا مەترسیا داعشێ ل سەر باژارێن رۆژئاڤایێ کوردستانێ، سەرۆک مەسعوود بارزانی بریارا پشتەڤانیا کۆبانێ دا و ل سەر فەرمانا وی، پارلامەنتۆیا کوردستانێ رۆژا 22ێ جۆتمەھا 2014ێ بریارا شاندنا چەک و پێشمەرگە ژ بۆ کۆبانی دا. ھێزێن پێشمەرگە ژی ژ ھەرێما کوردستانێ دەرباسی باکورێ کوردستانێ بوون، ژ ور ڤە ژی رۆژا 28ێ جۆتمەھا 2014 دەرباسی کۆبانێ بوون و دەستەک دان بەرەڤانیا ل کۆبانێ.
پێشمەرگە و ھێزێن کوردی دۆرپێچا ل سەر کۆبانێ شکاندن و کارین باژارێ کۆبانێ و ھەژمارەکا مەزن ژ گوندێن دەردۆرا وێ ژ دەستێ داعش ب تەمامی دەرخن و د 26 چلەیا 2015 دە سەرکەفتنا خوە راگھاندن.
