درۆنێن تركیه‌یێ سڤیلێن كو په‌یه‌دێ شاندنه‌ به‌نداڤا تشرینێ بۆمبه‌باران كرن

بالافرێن كه‌شفێ یێن تركیه‌یێ كاروانه‌كه‌ سڤیلان كو په‌كه‌كێ/په‌یه‌دێ ژ بۆی پشتگریا هه‌سه‌دێ شانده‌نه‌، ل به‌نداڤا تشرینێ بۆمبه‌باران كر، 12 كه‌س بریندار بوون.

رێخستنێن سیاسی یێن په‌یه‌دێ و په‌كه‌كێ ل رۆژئاڤا كوردستانێ، ل سه‌ر شاندنا ب زۆر یا شێنییان بۆ به‌نداڤا تشرینێ به‌رده‌وامن ژ بۆ كو پشتگریێ بدن هه‌سه‌دێ.

روانگه‌ها سووری یا مافێن مرۆڤان ئیرۆ رۆژا یه‌كشه‌می 26 چله‌یا 2025ێ ئاشكه‌ره‌ كر، بالافرێن كه‌شفێ یێن تركیه‌یێ كاروانه‌كه‌ سڤیلان ل نێزی به‌نداڤا تشرینێ بۆمبه‌باران كر، 12 كه‌س بریندار بوون و برینا هنه‌ك ژ وان گرانه‌.

روانگه‌هێ دا زانین، ژ رۆژا 8ی چله‌یێ ڤه‌ کاروانێن سڤیلان ژ ئالیێ بالافرێن بێمرۆڤێن دەولەتا ترک ڤە تێن هەدەفگرتن و ل دەردۆرا بەنداڤێ مری و بریندار هەنە.