د چارچۆڤەیا یەکرێزیا کوردی دە، ئەنجوومەنا نشتمانی یا کورد ل سووریێ (ئه‌نه‌كه‌سێ) د رۆژێن بێ دە جارەکە دن ب فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عەبدی رە دجڤە.
بەردەڤکێ ئه‌نه‌كه‌سێ فەیسەل یووسف گۆت: «سەرۆک بارزانی و هەڤپەیمانیا ناڤدەولەتی رژدن ل سەر نێزیکاتیا ئالیێن کوردی ل رۆژئاڤایێ کوردستانێ و د دەمەک نێزیک دە ئەوێ جارەکە دن هەڤدیتنێ ب مەزلووم عەبدی رە بکن».
بەردەڤکێ ئه‌نه‌كه‌سێ گۆت ژی، ئارمانجا جڤینا ب مەزلووم عەبدی رە، ژ بۆ گهیشتنا ب نێرین و داخوازێن هەڤبەشێن کوردێن سووریەیێ یە و تەکەز کر، هەر چقاس زوو ئەڤ یەکرێزی چێببە، ژ بۆ مللەتێ وان باشترە.
سەرۆک مەسعوود بارزانی رۆژا 16.01.2025ان ل هەولێرێ پێشوازی ل فەرماندارێ گشتییێ هێزێن سووریەیا دەمۆکراتیک (هه‌سه‌د) مەزلووم عەبدی کربوو.
بارەگەها بارزانی بەلاڤ کر، «د هەڤدیتنێ دە، رەوشا سووریەیێ و داوی پێشهاتێن ئەولەهی و سیاسییێن سووریەیێ، چارچۆڤەیا گشتی یا سەرەدەریکرنا ئالیێن کوردی ب رەوشا نوو یا سووریەیێ رە، و هەروەسا چاوانیا وەرگرتنا هەلوەستەکە هەڤپارا ئالیێن کوردییێن سووریەیێ هاتن گەنگەشەکرن».
هەروها تەکەز ل سەر وێ یەکێ ژی هات کرن کو، دڤێ ئالیێن کوردییێن سووریەیێ بێ دەستێوەردانا چ ئالیەکی و ب رێکارێن ئاشتیانە بریارێ ل سەر چارەنڤیسا خوە بدن، و پێخەمەتی گەرەنتیکرنا مافێن وان ب یەکرێزی و یەکهەلوەستیا هەڤپار ب دەستهلاتدارێن نوویێن سووریەیێ رە بگەهن هەڤفێمکرنێ و لهەڤکرنێ، هەروەسا فاکتەرێن ئاشتی و سەقامگریێ بن و رێیێ ل دوبارەبوونا وان نەخوەشیان بگرن یێن کو ب سەرێ گەلێ کورد و پێکهاتەیێن دن یێن سووریەیێ هاتنە.
