دەستەیا سەرۆکاتیا ئه‌نه‌كه‌سێ ب فەرماندارێ گشتییێ هێزێن سووریەیا دەمۆکراتیک (هه‌سه‌دێ) رە جڤیا و راگهاند، جڤین ئەرێنی بوو، هەروەسا تەکەز ل سەر چوونا کوردان ب شاندەکە هەڤپار و یەک نەرینێ ژ بۆ شامێ ژی کریە.
دەستەیا سەرۆکاتیا ئەنجوومەنا نشتیمانی یا کورد ل سووریەیێ (ئه‌نه‌كه‌س) دوهـ (سێشەم، 28.01.2025) ب فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عه‌بدی رە جڤیا.
بەردەڤکێ ئه‌نه‌كه‌سێ فەیسەل یووسف راگەهاند کو، ئەو جڤین ئەرێنی بوو. هەروەسا هەر دو ئالیان تەکەز ل سەر یەکهەلوەستیا کوردان کریە.
بەردەڤکێ ئه‌نه‌كه‌سێ هەروەسا گۆت، «هەر دو ئالیان تەکەز ل سەر چوونا کوردان ب شاندەکە هەڤپار و یەک نەرینێ ژ بۆ شامێ کریە».
بەردەڤکێ ئه‌نه‌كه‌سێ فەیسەل یووسف رۆژا دوشه‌می ژی راگەهاندبوو، ل ڤان نێزیکان هەڤدیتنەکە دن ژی ب فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عه‌بدی رە تێ کرن.
بەردەڤکێ ئه‌نه‌كه‌سێ هەروەسا ئاماژە ژی دابوو، «سەرۆک بارزانی و هەڤپەیمانیا ناڤدەولەتی ل سەر یەکرێزیا ئالیێن کوردی رژدن».
