وەزارەتا کارێن ناڤخوە یا ترکیەیێ قەیووم دانی سەر شارەداریا سێرتێ، پۆلیسان ژی شارەداری دۆرپێچ کر و ژ هەڤسەرۆکێن شارەداریێ رە گۆت کو قەیووم تایینی شارەداریێ هاتیە کرن.
دادگەها 5 مین یا جەزایێن گران یا ئامەدێ، دوهـ ب سه‌ده‌ما «ئەندامه‌تیا په‌كه‌كێ» 6 سال و 3 مەهـ جەزایێ گرتیگەهێ ل هەڤسەرۆکا شارەداریا سێرتێ سۆفیا ئالاگاشێ بری.
سۆفیا ئالاگاش ل دادگەها 5 مین یا جەزایێن گران یا ئامەدێ ژ بەر خەباتێن رۆژنامەگەریێ دهات دارزاندن.
ل گۆری نووچەیا ئاژانسا مەزۆپۆتامیایێ، پۆلیسان شارەداری دۆرپێچ کریە، ئالایەکە ترکان ب ئاڤاهیێ ڤە دالەقاندیە و ژ هەڤسەرۆکێن شارەداریێ رە گۆتیە کو قەیووم تایینی شارەداریێ هاتیە کرن.
هات دیارکرن کو دۆرپێچ بەردەوام دکە و گەل ژی ل بەر شارەداریێ کۆم بوویە.
وەزارەتا کارێن ناڤخوە یا ترکیەیێ ژی راگهاند کو پارێزگارێ سێرتێ کەمال کزلکایا بوویە قەیووم.
دڤێ وەرە گۆتن کو شارەداریا سێرتێ یا باکورێ کوردستانێ د دەستێ دەم پارتیێ دە بوو.
وەزارەتا کارێن ناڤخوە یا ترکیەیێ پشتی هلبژارتنێن 31ێ ئادارا 2024ێ قەیووم دانینە سەر شارەداریێن دەم پارتیێ یێن جۆلەمێرگ، مێردین، ئێلهـ، دێرسم، خەلفەتی، ئاکدەنیز، مکس و سێرتێ.
