ب ئێریشا ئاسمانی یا كو دوهـ ده‌وله‌تا ترك ل چیایێ گاره ئه‌نجام دای، 2 چه‌كدارێن په‌كه‌كێ هاتبوون كوشتن، وه‌زاره‌تا پاراستنا نه‌ته‌وی یا تركیه‌یێ ژی دبێژه: هه‌ر دوهـ ل هه‌رێمێن مه‌رتالا فه‌راتێ 13 چه‌كدارێن یه‌په‌گێ هاتنه هه‌ده‌ف گرتن.
بالافرێن شه‌ر یێن ده‌وله‌تا ترك دوهـ رۆژا سێشه‌می 28 چله‌یا 2025ێ لڤ و ته‌ڤگه‌را چه‌كدارێن په‌كه‌كێ چیایێ گاره ل هنداڤی سه‌رسنكێ بۆمبه‌باران كر، وه‌زاره‌تا پاراستنا نه‌ته‌وی یا تركیه‌یێ ژی ئیرۆ راگهاند كو 2 چه‌كدار د ئێریشێ دا هاتنه كوشتن.
هه‌ر دوهـ رۆژا سێشه‌می، بالافرێن شه‌ر هه‌رێمێن چیایی یێن زێبارێ ل ده‌ڤه‌را شێلادزێ ژی بۆمبه‌باران كربوو، لێبه‌لێ زرارێن وان ئێریشان نه‌هاتنه زانین.
وه‌زاره‌تێ ئیرۆ رۆژا چارشه‌می 29 چله‌یێ داخویانی دا و گۆت كو هه‌ر دوهـ رۆژا سێشه‌می 28 چله‌یێ ئێریش ل هه‌رێمێن مه‌رتالا فه‌راتێ ل باكورێ سووریه‌یێ هاتنه ئه‌نجام داییه و 13 چه‌كدارێن یه‌په‌گێ بوونه هه‌ده‌ف.
