ژ ئالیێ پارێزگەریا سێرتێ ڤە ھات راگھاندن کو، ل تەڤاھیا باژێری ژ بۆ دەما 10 رۆژان ھەموو چالاکی ھاتنە قەدەغەکرن.
پشتی کو قەیووم ژ بۆ شارەداریا سێرتێ ھاتیە دانین، پارێزگەریا سێرتێ ژی بریارەکا نوو ژ بۆ رایا گشتی پارڤە کر.
ل گۆری بریارا پارێزگەریا سێرتێ، ل تەڤاھیا باژێری ھەتا 10 رۆژان ھەموو چالاکی ھاتنە قەدەغەکرن. د بریارێ دە بال تێ کێشان کو وەلاتی پابەندی بریارێ بن.
پارێزگاریا سێرتێ ددە زانین کو، چالاکیێن ژ ئالیێ پارێزگاری یان ژی قایمەقامان ڤە دەستوورا وان دانە نە د ناڤا ڤێ قەدەغەیێ دە نە.
روونشتنا گرێدایی دۆزا ھەڤسەرۆکا شارەداریا سێرتێ سۆفیا ئالاگاش دوھی (سێشەمبێ، 28/1/2025) ل دادگەھا تاوانان یا پێنجێ یا دیاربەکرێ ب رێ ڤە چوو.
سۆفیا ئالاگاش د وێ روونشتنێ دە ب تۆمەتا “ئەندامەتیا پەکەکێ” ھات تاوانبارکرن، و ل داویێ د روونشتنا حەفتێ یا دادگەھێ دە سزایێ زندانیکرنێ ژ بۆ دەما شەش سال و سێ مەھان ل سەر وێ ھات سەپاندن.
پشتی سەپاندنا وی سزای، وەزارەتا ناڤخوەیا ترکیەیێ راگەھاند کو، قەیووم ل جھێ ھەڤسەرۆکا شارەداریا سێرتێ ھات دانان.
سۆفیا ئالاگاش د ھلبژارتنێن شارەداریان یێن سالا بۆری دە کاندیدا دەم پارتیێ بوو. ژ پشتی ھلبژارتنێن 31 ئادارێ، قەیووم ژ بۆ ھەشت شارەداریێن دەم پارتیێ ھاتنە دانان کو ئەو ژی ئەڤن؛ ھەکاری، مێردین، باتمان، دێرسم، خەلفەتی، ئاکدەنیز، باخچەسەرای و ل داویێ ژی سێرت.
