پارتییا وەلاتپارێزێن کوردستانێ دانینا قەیوومان شەرمەزار دکە

 پارتییا وەلاتپارێزێن کوردستانێ (PWK) دانینا قەیوومێ ل سەر شارەدارییا سێرتێ شەرمەزار کر.

پارتییا وەلاتپارێزێن کوردستانێ (PWK) ل سەر دانینا قەیوومە ل سەر شارەدەرییا سێرتێ داخویانییەک پارڤەکر و وھا گۆت:

“ھەڤسەرۆکا شارەداریا سێرتێ یا دەم پارتیێ سۆفیا ئالاگاش رۆژا 28/1/2025، ب ھنجەتا “ئەندامتیا رێخستنا تەرۆرێ”، 6 سال و 3 مەھ سزا بۆ ھاتبوو برین. پشتی ڤێ بریارێ، وەزارەتا ناڤخوەیا کۆمارا ترکییەیێ راگھاند کو ھەڤسەرۆکا شارەداریا سێرتێ یا دەم پارتیێ سۆفیا ئالاگاش ژ وەزیفەیێ دەرکریە و ل  شوونا وێ پارێزگارێ سێرتێ کەمال کزلکایا وەکی قەیووم ھاتییە دانین. بریارا دانانا قەیوومان، چنە حەسباندن و بنپێکرنا ئیرادەیا دەنگدێرێن سێرتێ یە، بریارەکا سییاسییە، ل دژی پیڤانێن دەمۆکراسییێ یە، نایێ قەبوولکرن. ئەم بریارێن دانانا قەیوومان شەرمەزار دکن.

روونشتنا گرێدایی دۆزا ھەڤسەرۆکا شارەداریا سێرتێ سۆفیا ئالاگاش دوھی (سێشەمبێ، 28/1/2025) ل دادگەھا تاوانان یا پێنجێ یا دیاربەکرێ ب رێ ڤە چوو.

سۆفیا ئالاگاش د وێ روونشتنێ دە ب تۆمەتا “ئەندامەتیا پەکەکێ” ھات تاوانبارکرن، و ل داویێ د روونشتنا ھەفتێ یا دادگەھێ دە سزایێ زندانیکرنێ ژ بۆ دەما شەش سال و سێ مەھان ل سەر وێ ھات سەپاندن.

پشتی سەپاندنا وی سزایی، وەزارەتا ناڤخوەیا ترکیەیێ راگەھاند کو، قەیووم ل جھێ ھەڤسەرۆکا شارەداریا سێرتێ ھات دانان.

پشتی کو قەیووم ژ بۆ شارەداریا سێرتێ ھات دانین، پارێزگەریا سێرتێ ژی بریارەکە نوو ژ بۆ رایا گشتی پارڤە کر.

ل گۆری بریارا پارێزگەریا سێرتێ، ل تەڤاھیا باژێر ھەتا 10 رۆژان ھەموو چالاکی ھاتنە قەدەغەکرن. د بریارێ دە بال تێ کێشان کو وەلاتی پابەندی بریارێ بن.