پارتیا وەلاتپارێزێن کوردستانێ (PWK) شەھیدێن کۆمکوژیا 1ێ شباتێ ل ھەولێرێ ببیر ئانین و کوژەر و پشتگرێن ڤێ کۆمکوژییێ روورەش کرن.
نڤێسینگەها راگەھاندنێ یا PWK ئیرۆ د سالڤەگەرا 21ێ یا کۆمکوژیا 1ێ شوباتێ ل ھەولێرێ دە، داخویانیەک بەلاڤ کر، کو تێ دە 103 کەس شەھید بووبوون.
داخویانیا نڤێسینگەها راگەھاندنێ یا PWK
د 1ێ شوباتا 2004 دە ل ھەولێرێ د دەما پیرۆزباھیا جەژنێ دە ژ ئالیێ ئەنسار ئەل ئیسلامێ ڤە ئێریش پێک ھات و د ئەنجاما ئێریشێ دە ژ زێدەتری 100 کەسان ژیانا خوە ژ دەست دان و 200 کەسێن ژ وان ژی بریندار بووبوون.
رۆژا 1ێ شوباتێ ل ھەولێرێ د ئەنجاما ئێریشێن ل سەر ئاڤاھیێن پەدەکێ و یەنەکێ دە بەرپرسێن بلندیێن ھەر دو پارتییان ژیانا خوە ژ دەست دان و بریندار بووبوون.
ئێریش د دەما پیرۆزباھییێن جەژنێ دە ھاتیبوون کرن و د ناڤ کەسێن شەھید کەتنە دە ئەندامێن سەرکردایەتیا پەدەکێ سامی عەبدوڕەحمان و سەید عەبدوللاھ، ئەندامێ کۆمیتەیا ناڤەندی یا پەدەکێ شەوکەت شێخ یەزدین، پارێزگەرێ ھەولێرێ ئەکرەم مەنتق و ئالیکاری وی و د ھەمان دەمێ دە سەرۆکێ یەکتییا نڤیسکارێن کوردستانێ یێ شاخا ھەولێرێ مەھدی خۆشناو، قایمەقامێ ناڤەندا ھەولێرێ ئەحمەد رۆژبەیانی، رێڤەبەرێ پۆلیسێن ھەولێرێ عەمید نەریمان و بەرپرسێ یەنەکێ یێ ھەولێرێ شاخەوان عەباد و گەلەک بەرپرسێن یەنەکێ ژیانا خوە ژ دەست دابوون.
ئەم د 21ەمین سالڤەگەرا کۆمکوژییا 1ێ شوباتێ دە، قاتل و پشتگرێن ڤێ کۆمکوژییێ روورەش دکن، شەھیدێن ڤێ ئێریشێ و ھەموو شەھیدێن کوردستانێ ب گرامی ببیر تینن.
