فەرماندارێ گشتی یێ ھێزێن سووریەیا دەمۆکراتیک (ھەسەد)ێ چاڤپێکەفتنەکێ لگەل ئاژانسا ئەسۆشێت پرێسێ دکە و پێ رە دانووستاندنان ل سەر سووریەیا نوو و ھند مژارێن گرێدایی رەوشا وێ و پاشەرۆژا وێ دکە.
فەرماندارێ گشتی یێ ھێزێن سووریەیا دەمۆکراتیک (ھەسەد)ێ مەزلووم عەبدی د چاڤپێکەفتنەکێ دە لگەل ئاژانسا ئەسۆشێت پرێسێ گۆت، “نەھێلانا رژێما ئەسەد پێنگاڤەکا گرنگ و دیرۆکی بوو، ژ بەر کو داخوازا گەلێ سووریەیێ بوو.”
فەرماندارێ گشتی یێ ھێزێن سووریەیا دەمۆکراتیک (ھەسەد)ێ ھەروەسا گۆت، “ئەم ھێڤیدارین سووریەیەکە نوو بێ ئاڤاکرن، نە کو ھەر عەینی ئەزموونا رژێما بەعس بهێت دوبارەکرن.”
مەزلووم عەبدی د دەرحەقا دانانا ئەحمەد شەرع وەکی سەرۆکێ سووریەیێ یێ نوو دە ژی گۆت، “ئەم تەڤلی دانانا ئەحمەد شەرع وەکی سەرۆکێ سووریەیێ یێ قۆناغا ڤەگوھێز نەبوون، لەوما چ گۆتنان ل سەر ڤێ مژارێ ناکن.”
ناڤبری د دەرحەقا دانووستاندنێن ناڤبەرا وان و ئیدارەیا نوویا سووریەیێ دە ژی ئاماژە دا، “ھەڤدیتن دێ بەردەوام بن، د ناڤبەرا مە دە ناڤبەینکار ھەنە، نێزیکبوونا مە لگەل حکوومەتا شامێ ژی دێ ل سەر ئەنجام و دەستکەفتیان بت.”
فەرماندارێ گشتی یێ ھەسەدێ ل سەر چارەنڤیسا ھێزێن سووریەیا دەمۆکراتیک ژی راگەھاند، “مە چ ئارێشەیەک نینە کو ھێزێن سووریەیا دەمۆکراتیک ببن بەشەک ژ سیستەما بەرگریێ یا سووریەیێ و ئەم دێ ببن بەشەک ژ پێکھاتەیا وەزارەتا بەرگریێ، لێ پێدڤیتیا ڤێ یەکێ ژی ب دانوستاندنان ھەیە و موومکنە د دەمەکێ وەسا زوو دا نەیێ کرن.”
مەزلووم عەبدی د دەرحەقا سووریەیا نوو دە ژی رۆن کر، “ئەم دخوازین سووریەیەکە دەمۆکراتیک و سڤیل بە ژ بۆ کو مافێن ھەمی پێکھاتەیێن سووریەیێ پاراستی بن، نە کو دەستھلاتەکە ناڤەندی، بەلکی پارەکە دەستھلاتان د دەستێ پارێزگەھان دە بە. ئەڤ ژی نەرینا مە ژ بۆ سووریەیێ ب گشتییە.”
ناڤبری ھەروەسا رەد کر کو وان چ پەیوەندیەک لگەل پارتیا کارکەرێن کوردستانێ (پەکەکێ) ھەبە و گۆت، “ئەم ب سەر پەکەکێ ڤە نینین و مە چ پەیوەندی لگەل وێ و شەرێ ناڤبەرا وێ و ترکیەیێ ڤە نینە، لێ ئەڤە کریە بەھانەیەک ژ بۆ کو ئێریشی سەر دەڤەرێن مە بێ کرن.”
