نوونەرێ تایبەتێ پۆتین، مەسروور بارزانی داخوازكره‌ رووسیایێ

نوونەرێ تایبەتێ سەرۆکێ رووسیایێ ب فەرمی سەرۆکوەزیرێ هەرێما کوردستانێ داخواز كر سه‌ردانا مۆسکۆ یا پایتەختا رووسیایێ بكه‌.

سەرۆکوەزیرێ هەرێما کوردستانێ مەسروور بارزانی ئیرۆ 6 سباتا 2025ێ ل هەولێرێ، نوونەرێ تایبەتێ سەرۆکێ رووسیایێ ڤلادمیر پۆتین و ئالیکارێ وەزیرێ کارێن دەرڤەیێ رووسیایێ میخائیل بۆگدانۆڤ و شاندەیا پێ رە پێشوازی کر.

ل گۆری داخویانیەکە حکوومەتا هەرێما کوردستانێ، د هەڤدیتنێ دە ل سەر پێشهاتێن داوی یێن ل ئیراق و هەرێما کوردستانێ و بپێشخستنا پێوەندیان گۆتووبێژ هاتن کرن.

د داخویانیێ دە هات گۆتن کو نوونەرێ تایبەتێ سەرۆکێ رووسیایێ ئاماژە ب پێگەها گرینگا هەرێما کوردستانێ و پێوەندیێن دۆستانە و دیرۆکی یێن وەلاتێ خوە ب هەرێما کوردستانێ رە کر.

بۆگدانۆڤ تەکەزی ل سەر گرینگیا خورتکرنا پێوەندیێن رووسیایێ یێن ب هەرێما کوردستانێ رە کر.

نوونەرێ تایبەتێ سەرۆکێ رووسیایێ ب فەرمی سەرۆکوەزیرێ هەرێما کوردستانێ داخواز كر كو سه‌ردانا مۆسکۆ بكه‌.

مەسروور بارزانی د جڤینێ دە خوەستەکا هەرێما کوردستانێ یا ژ بۆ بپێشخستنا پێوەندیێن دوئالی ئانی زمان.

د بەشەکە دن یا هەڤدیتنێ دە، تەکەزی ل سەر گرینگیا چارەسەرکرنا پرسگرێکێن د ناڤبەرا ئیراق و هەرێما کوردستانێ دە هات کرن.

سەرەراستکرنا یاسایا بودجەیا فەدەرال و لهەڤکرنا ل سەر هناردەکرنا پەترۆلا هەرێما کوردستانێ وەکی گاڤێن ئەرێنی هاتن نرخاندن.

بەشەکە دن یا جڤینێ دەربارێ گوهەرینێن داوی یێن ل سووریە و رۆژئاڤایێ کوردستانێ بوو.

هەر دو ئالیان ل سەر پێویستیا پاراستنا ئەولەهی و ئارامی و مافێن گەلێ کورد و هەموو پێکهاتەیێن سووریەیێ گۆتووبێژ کرن.