رێخستنا په‌كه‌كێ ئیرۆ ب فه‌رمی دانپێدان كر كو هه‌ردو پاسه‌وانێن سینۆر یێن ئیراقێ كو ژ شێنیێن دهۆكێ نه، ب ده‌ستێن قرێژ یێن چه‌كدارێن وێ هاتنه شه‌هید كرن و گه‌ف ژی خوارنه ئه‌وێ جاره‌كه دن ژی ئێریشی پاسه‌وانان بكه.
ل رۆژا 24 چله‌یا ئیسال 2025ێ ل نێزی گوندێ شیلانه‌یێ قەزایا باتیفا یا زاخۆیێ، چەکدارێن په‌كه‌كێ ئێریشی ده‌وریه‌یا پاسه‌وانێن سینۆر یێن ئیراقێ كر، دو پاسه‌وان ب ناڤێن «عەلی رەمەزان» 40 سال ژ شێنیێن سێمێلێ و «مێهڤان ناجی» 41 سال ژ شێنیێن دهۆکێ شەهید كرن، پاسه‌وانه‌كی دن ب ناڤێ «بێوار جەمیل» 39 سال بریندار كه‌ت.
مه‌دیایا په‌كه‌كێ ل هه‌مان رۆژا بوویه‌رێ ره‌د كر كو ئه‌ڤ پاسه‌وان ژ هێلا گه‌ریلایان ڤه راستی ئێریشێ هاتبن و گۆتبوو: «بالافرێن ده‌وله‌تا ترك ئێریشی وان كریه».
ئیرۆ رۆژا 9 سباتا 2025ێ، هه‌په‌گێ باسكێ له‌شكری یێ په‌كه‌كێ داخویانی دا و تام به‌ره‌ڤاژی رۆژا بوویه‌رێ داخویانی دا و گۆت: «ل 24ێ چله‌یێ پاسه‌وانێن سینۆر و ئارتێشا تركیه‌یێ ئێریشی گه‌ریلایان كربوو، وان ژی د چارچووڤه‌یا مافێ خوه‌پاراستنێ ده به‌رگری كر و ئه‌و پاسه‌وان كوشتنه».
گه‌لۆ چ ببوو؟
رۆژا 24 چله‌یا 2025ێ دوریه‌یا پاسه‌وانێن سینۆری یێن ئیراقێ ل ده‌ڤه‌را سینۆرێ گوندێ شیلانه‌یێ سینۆرێ باتیفا د ئه‌ركا خوه دا بوون و چاڤدێریا هه‌رێمێ دكرن، ژ نشكان ڤه راستی ته‌قه‌یا په‌كه‌كێ هاتن. د وێ رۆژێ ده ت ئۆپه‌راسیۆنه‌كه ئارتێشا تركیێ ل ده‌ڤه‌را حه‌فته‌نینێ نه‌بوو.
ده‌وریا پاسه‌وانێن سینۆر ل سه‌رێ سبه‌هێ راستی ئێریشا هات، په‌كه‌كێ ل رۆژا بوویه‌رێ گۆت كو ئارتێشا تركیه‌یێ ئه‌و كوشتنه، لێ شوونێن گوللـه‌یان ل سه‌ر جه‌سه‌دێ وان هه‌بوو، لوما ژی ئاشكه‌ره بوو كو ئه‌و پاسه‌وان ب ئێریشا بالافرێن تركان نه‌هاتنه قه‌تل كرن.
پاش به‌لاڤبوونا نووچه‌یا شه‌هیدكرنا پاسه‌وانان د مه‌دیایا هه‌رێما كوردستانێ و ئیراقێ ده، مه‌دیایا په‌كه‌كێ خوه‌ست ڤێ ته‌وانا خوه ب گه‌ل بده ژبیر كرن و زه‌ختا كو ل سه‌ر رێخستنێ چێبووی ڤه‌ره‌ڤینه، لۆما ژی گۆت بالافران ل وان خستیه، لێ به‌لێ ئه‌ڤ ده‌ره‌وا په‌كه‌كێ زوو ئیفشا بوو و ژ به‌ر كو هه‌م مالباتێن قوربانییان و هه‌م ژی ده‌ردوورا وان و گه‌لێ كوردستانێ ب گشتی به‌رته‌كێن مه‌زن نیشانی په‌كه‌كێ دان، لۆما ژی په‌كه‌كه ئیرۆ هاتیه و پاش ده‌رباسبوونا 15 رۆژان ب رووقایمی گۆتیه: «چه‌كدارێن مه ئه‌و پاسه‌وان كوشتنه».
په‌كه‌كێ ته‌ڤی دانپێدانا ب قه‌تلكرنا ڤان دو له‌شكه‌رێن كورد، گه‌ف ژی خوارنه كو ئه‌وێ جاره‌كه دن ژی ئێریشی پاسه‌وانان بكه.
تڤه‌نگا په‌كه‌كێ ته‌نێ سینگا كوردان ناس دكه؟
پاسه‌وانێن كو په‌كه‌كێ شه‌هید كرین، یێك باڤێ 4 و یێ دن باڤێ 7 زارۆكان بوو، په‌كه‌كێ ئه‌و ب ئاوایه‌كی هۆڤانه و ب زانه‌بوون گوللـه‌باران كرن، 11 زارۆكێن وان سێوی هشتن.
راپۆرێن پزیشكیا داد ئاشكه‌ره كرن كو شوونێن گوللـه‌یێن كلاشینكۆفێ ل سه‌ر لاشه‌یێ وان بوون، لۆما ژی داخویانیا مەدیایا پەکەکێ یا کو دبێژە، دەولەتا ترک ب بالافران ل ڤان ھەر دو لەشکەران خستیە، ب تەمامی دەرەوە و خاپاندنه و ئیرۆ په‌كه‌كێ روویێ خوه یێ راست نیشانی گه‌لێ باشوورێ كوردستانێ ب تایبه‌ت شێنیێن دهۆك و زاخۆیێ دا كو ئه‌و ژی لۆلیا تڤه‌نگا په‌كه‌كێ ته‌نێ سینگا كوردان ناس دكه.
