ژ بەر کوشتنا ئەندامەکی ھێزێن ئەولەھیێ یێن ئیرانێ د دەما خوەنیشاندانان دە، تایێ یەکێ یێ دادگەھا تاوانان یا ئورمیێ سزایێ سێدارەدانێ ژ بۆ جوانەکی کوردێ خەلکێ باژارێ بۆکانێ یێ رۆژھلاتا کوردستانێ دەرخست، ھەروەسا سزایێ 10 ھەتا 15 سالێن زیندانیکرنێ ل سەر دو جوانێن دن ژی سەپاند.
تۆرا ھەنگاوێ یا مافێن مرۆڤان پارڤە کریە، “ژ بەر تاوانا کوشتنا ب قەسد یا یەک ژ ئەندامێن هێزێن بەسیج د دەما برێڤەچوونا خوەنیشاندانا سەرانسەری یا ئیران و رۆژھلاتێ کوردستانێ دە، سزایێ سێدارەنێ ژ ئالیێ تایێ یەکێ یێ دادگەھا تاوانێن گرێدایی جوانێن پارێزگەھا ئورمیێ ڤە ژ بۆ پێژمان سولتانی یێ 32 سالی، کو یەک ژ زیندانیێن سیاسی یێن خوەنیشاندانا ئیلۆنا 2022یێ یا باژارێ بۆکانێ بوو، ھات دەرخستن.”
دو تۆمەتبارێن دن ژی، رزگار بەگزادە بابامیری یێ 47 سالی و سۆران قاسمی یێ 28 سالی کو وەکی عەلی تێ ناسکرن، دەست د وێ تاوانێ دە ھەبوویە. ھەر یەک ژ وان سزایێن 10 سال و 15 سالێن زندانیکرنێ ژێ رە ھاتنە برین، لێ کەسەکی دن ب ناڤێ کاوە سالحی یێ 42 سالی بێ تاوان دەرکەت.
پێژمان سولتانی ل رۆژا 15ێ نیسانا 2023 ژ ئالیێ ھێزێن ئەولەھیێ یێن ئیرانێ ڤە ھاتبوو گرتن.
