شاندا دەم پارتیێ ژ بۆ ئیمرالیێ سەردانا هەولێرێ دکە و ب سەرۆک بارزانی رە دانوستاندنان ل سەر پرۆسەیا نوو یا ئاشتیێ ل ترکیە و باکورێ کوردستانێ دکە.
پارتیا وەکهەڤی و دەمۆکراسیا گەلان (دەم پارتی) ئیرۆ (دوشەم، 10.02.2025) د راگەهاندنەکێ دە ئاماژە دا کو شاندا وێ ژ بۆ ئیمرالیێ، کو دو جاران ب رێبەرێ پارتیا کارکەرێن کوردستانێ (په‌كه‌كێ) یێ زیندانکری عه‌بدوللا ئۆجالان رە جڤیایە، سەردانا هەولێرێ دکە.
ل دووڤ وێ راگەهاندنێ، شاندا دەم پارتیێ کو ژ پەروین بولدان و سری سورەیا ئۆندەر پێک تێ ل رۆژا یەکشەمیا بێ (16.02.2025) سەردانا هەولێرێ دکە و ب سەرۆک بارزانی رە دانووستاندنان ل سەر پێڤاژۆیا نوو یا ئاشتیێ ل ترکیە و باکورێ کوردستانێ و ئەنجامێن جڤینێن وان یێن ب ئۆجالان رە دکە.
هەتا نها شاندا دەم پارتیێ دو جاران ل گراڤا ئیمرالیێ ل سەر پرۆسەیا نوو یا ئاشتیێ ل ترکیە و باکورێ کوردستانێ ب ئۆجالان رە جڤیایە. تەڤی کو ب ئاوایەکی فەرمی نەهاتیە راگەهاندن، لێ مەدیایێن ترکیەیێ ئاماژە دایە کو ل ڤان نێزیکان شاندا دەم پارتیێ ژ بۆ جارا سێیێ سەردانا ئیمرالیێ دکە.
مەدیایێن ترکیەیێ بەحسا وێ یەکێ ژی دکن کو پشتی وێ جڤینێ، ئۆجالان ل زیندانا ئیمرالیێ ب ئاوایەکی راستەراست پەیامەکێ ل سەر پرۆسەیا نوو یا ئاشتیێ پارڤە دکە و تێ دە داخوازێ ژ چەکدارێن په‌كه‌كێ دکە کو، چەکێ خوە دانە و دەست ب دانووستاندنان بکە.
رۆن نینە کا ئۆجالان ل بەرانبەری چ داخوازا چەکدانانێ ژ په‌كه‌كێ دکە، لێ یا کو هەمی ل سەر یەکن گەرەنتیکرنا مافێن کوردان د ناڤ دەستوورێ ترکیەیێ دە یە، د سەر هەمیان رە ژی دانپێدان ب زمانێ کوردی وەکی زمانەکی فەرمی، ئازادکرنا هەژمارەکە زێدە یا سیاسەتمەدارێن زیندانیکری یێن کورد، راکرنا قەیوومان ژ سەر شارەداریێن کوردی و چەند مافێن دنن.
