ناسنامه‌یا جوانه‌كی دن یێ ئێزدی ئیفشا بوو كو رێخستنا په‌كه‌كێ 6 سالان به‌رێ ل چیایێن باشوورێ كوردستانێ ب ده‌ستێ ئارتێشا تركیه‌یێ دابوو كوشتن و مرنا وی ڤه‌شارتی هشتبوو.
هه‌په‌گێ باسكێ له‌شكه‌ری یێ په‌كه‌كێ دوهـ رۆژا دوشه‌می 10 سباتا 2025ێ ناسنامه‌یا چه‌كداره‌كی خوه یێ یێ ب ناڤێ فارووق شه‌ره‌ف ئاشكه‌ره كر كو ل سالا 2019ێ ل باشوورێ كوردستانێ كه‌تیه به‌ر ئێریشێ ده‌وله‌تا ترك و ژیانا خوه ژ ده‌ست دابوو.
هه‌په‌گێ وه‌كه ب هه‌زاران جوانێن كوردان، مرنا فارووق شه‌ره‌ف ژی بۆ ده‌ما 6 سالان ڤه‌شارت بوو.
ئاگاهی ده‌ربارێ ناسنامه‌یا فارووق وهانه:
ناڤ: فارووق شه‌ره‌ف قاسم.
ناڤێ په‌كه‌كێ لێ كری: فه‌داكار شه‌نگال.
جهێ ژ دایكبوونێ: شه‌نگال.
ئۆل: ئێزدی.
په‌كه‌كێ فارووق وه‌كه ب ده‌ها جوانێن ئێزدی ب ناڤێ وه‌لاتێ شێرین خاپاندن و به‌رێ وان دان چیا و ژ بۆی دۆزه‌كێ دان كوشتن كو ت پێوه‌ندییا وان پێڤه تونه كو ئه‌و ژی براتییا گه‌لان و ده‌مۆكراتیكرنا تركیه‌یێ یه، ل ده‌مه‌كی خه‌ونا فارووق ته‌نێ قه‌دیانا داعشێ و ئازادكرنا شه‌نگالێ بوو.
په‌كه‌كێ باژارێ فارووق داگیر كر و ته‌سلیمی داگیركه‌ران و حه‌شدا شه‌عبی كر، شێنیێن وێ د كامپان ده هشتنه و ژ فارووق ره گۆ هه‌ره ژ بۆی ده‌مۆكراتیكبوونا تركیه‌یێ بمره.
ژ ده‌ما كو په‌كه‌كه كه‌تیه د شه‌نگالێ ده، ب سه‌دان جوانێن ئێزدی خاپاند و هنه‌ك ژێ ره‌ڤاندن، هنه‌ك ژێ ل باشوور و هنه‌ك ل باكورێ كوردستانێ فه‌دا كرن، هێژان ژی مالباتێن پرانیا وان ت ئاگاهی ده‌ربارێ زارۆكێن خوه ده‌ست نه‌خستنه.
