سەرۆکوەزیر مەسروور بارزانی راگهاند، ئەولەکاری و ئارامیا کو ل هەرێما کوردستانێ هەیە، گەلەکی گرینگە ژ بۆ هاندانا کارساز و وەبەرهێنەرێن بیانی کو وەرن وەبەرهێنانێ بکن.
سەرۆکوەزیرێ هەرێما کوردستانێ مەسروور بارزانی ئیرۆ 11ێ سباتێ د پانەلەکێ دە د لووتکەیا جیهانی یا حكوومه‌تان دە ل ئیماراتێ راگهاند، «ئەولەکاری و ئارامیا کو ل هەرێما کوردستانێ هەیە، گەلەکی گرینگە ژ بۆ هاندانا کارساز و وەبەرهێنەرێن بیانی کو وەرن ل هەرێما مە ڤەبەرهێنانێ بکن».
سەرۆکوەزیر مەسروور بارزانی تەکەز کر ژی: «ئەم هەول ددن پرسگرێکێن خوەیێن سیاسی یێن ب حكوومه‌تا فەدەرالا ئیراقێ رە چارەسەر بکن».
دا زانین ژی: «ئەم ژ نێز ڤە ب سەکتۆرا تایبەت رە کار دکن، دا کو د چارچۆڤەیا بەرنامە و پلانسازیا خوە دە، چاکسازیێ د پرۆژەیێن حكوومه‌تێ دە بەردەوام بکن. دکارم ببێژم کو ئەم د گەلەک ئارمانجێن خوە دە بسەر کەتنە، لێ بێگومان د پاشەرۆژێ دە هین رێیەک درێژ ل پێشیا مە هەیە».
سەرۆکوەزیر مەسروور بارزانی گۆت: «دڤێ گەل د رۆژەڤا هەر حكوومه‌تێ دە بە، ئەگەر دخوازە د پرۆژە و خەباتێن خوە دە ب سەر بکەڤە. ئەم ل پێدڤیێن خەلکێ دنێرن، ژ بۆ کو ئەم ب ئاوایەکی هەری باش خزمەتا وان بکن، ژ بۆ ڤێ یەکێ دڤێ چەند کار بێن کرن، دڤێ ئەم لهەڤ بکن و دانووستاندنان بکن، ل ئەنیێن جودا تێبکۆشن دا کو بگهن ئارمانجێن کو د بەرژەوەندیا گەل دە نە. مە هەول دا کو باشی و تەندورستیا گەل ل بەر چاڤان بگرن».
دەربارێ پەیوەندیێن د ناڤبەرا هەرێما کوردستانێ و ئیماراتێ دە ژی سەرۆکوەزیرێ هەرێما کوردستانێ مەسروور بارزانی گۆت: «پێویستە دەرس ژ ئەزموون و سەرپێهاتیێن وەلاتێن دن وەربگرن. ئیمارات یەک ژ وان وەلاتانە کو ئەم لێ دنێرن و د جیبجیکرنا پرۆژەیا چاکسازیێ دە کو مە ل هەرێما کوردستانێ دەست پێ کریە، ژێ فێر دبن».
د پانەلێ دە پرۆسەیا پەروەردەیێ بەشەکە دنا ژ ئاخافتنا سەرۆکوەزیر مەسروور بارزانی بوو و گۆت: «بێگومان باشکرنا پرۆسەیا خوەندنێ، یەک ژ کارێن مەیە. ئەم کار دکن کو پەروەردە ل هەرێما کوردستانێ بگهە ئاستا ناڤدەولەتی. ئەم شانازن کو چەندین زانینگەهـ و پەیمانگەهێن گشتی، تایبەت و ناڤدەولەتی ل هەرێما مە هەنە، گەلەک ژ دەرچوویێن مە هەم د سەکتۆرا گشتی و هەم ژی د سەکتۆرا تایبەت دە کار دکن».
