هەڤسەرۆکا دەم پارتیێ دبێژە، جڤینا شاندا دەم پارتیێ بۆ ئیمرالیێ ل گەل سەرۆک بارزانی، دێ راگهاندنا پەیاما عه‌بدوللا ئۆجالان یا دەربارێ پرۆسەیا نوو یا ئاشتیێ دە بپاش بخە.
هەڤسەرۆکا دەم پارتیێ تولای هاتمۆگولاری راگهاند، شاندا پارتیا وان دێ رۆژا 16.02.2025ان سەردانا هەولێرێ بکە و ب سەرۆک بارزانی رە بەحسا پرۆسەیا نوو یا ئاشتیێ ل ترکیە و باکورێ کوردستانێ بکە.
مەدیایا ترکیەیێ پێشتر راگهاندبوو، رێبەرێ گرتی یێ په‌كه‌كێ عه‌بدوللا ئۆجالان دێ رۆژا 15.2.2025ان ژ زیندانا ئیمرالیێ ڤە پەیامەکێ ل سەر پێڤاژۆیا نوو یا ئاشتیێ ل ترکیە و باکورێ کوردستانێ بەلاڤ بکە.
هەڤسەرۆکێ دەم پارتیێ ب دوور زانی کو ئۆجالان د 15ێ سباتێ دە پەیاما خوە بدە، ژ بەر کو وەکە ئەو ب خوە دبێژە: «شاندا ئیمرالیێ دێ رۆژا 16ێ سباتێ سەردانا هەرێما کوردستانێ بکە و دێ چەند هەڤدیتنان پێک بینە. ئەنجامێن هەڤدیتنان دێ پێشکێشی عه‌بدوللا ئۆجالان بێ کرن و پشترە، ئۆجالان دێ پەیاما خوە بەلاڤ بکە».
هاتیمۆگولار د وێ باوەریێ دەیە کو ئۆجالان دێ د ڤێ مەهێ دە ل سەر پێڤاژۆیا نوو یا ئاشتیێ ل ترکیە و باکورێ کوردستانێ پەیامەکە دیرۆکی بدە. هەر وها گۆت: «ئۆجالان د پەیاما خوە دە، دێ تەکەزی ل سەر چارەسەرکرنا پرسا کورد ب رێیا ئاشتی و دیالۆگێ بکە، ژ بەر کو ب شەر و پەڤچوونان ب سالانە پرسگرێک چارەسەر نەبوونە».
شاندا دەم پارتیێ بۆ ئیمرالیێ یا کو بریارە سەردانا هەرێما کوردستانێ بکە، ژ په‌رڤین بولدان و سڕی سورەییا ئۆندەر پێک تێ کو د دەما بۆری دە ل گرتیگەها ئیمرالیێ ب عه‌بدوللا ئۆجالان رە هەڤدیتن کربوون.
