دەم پارتی پشتی کو شاندەیا ئیمرالیێ ژ هەرێما کوردستانێ ڤەگەرە دێ داخوازا هەڤدیتنا ب رێبەرێ په‌كه‌كێ عه‌بدوللا ئۆجالان رە بکە.
مەجلسا دەم پارتیێ ل سەر “روودانێن سیاسی، تایینکرنا قەیوومان، دەستەسەرکرن، لێپرسین و پەیاما عه‌بدوللا ئۆجالان” جڤیا.
ل گۆری نووچەیا ئانکایێ، حکوومەتێ هین ژی زەلال نەکریە ئۆجالان دێ ل کوو و د چ شەرت و مەرجان دە پەیاما خوە بدە.
شاندەیا دەم پارتیێ یا ئیمرالیێ دێ وەرە هەرێما کوردستانێ و هنەک هەڤدیتنان بکە.
دەم پارتیێ دیار کر کو شاندە دێ 16ێ سباتێ ل هەولێرێ ب سەرۆک مەسعوود بارزانی و سەرۆکێ هەرێما کوردستانێ نێچیرڤان بارزانی رە بجڤە.
شاندە دێ رۆژا 17ێ سباتێ ژی هەرە سلێمانیێ و ب سەرۆکێ یه‌نه‌كێ بافل تالەبانی، ئالیکارێ سەرۆکوەزیر قوباد تالەبانی و رایەدارێن یه‌نه‌كێ رە بجڤە.
ل گۆری ئاگاهیێن کو هاتنە بدەستخستن، شاندە دێ پشتی ڤان هەڤدیتنان ژ بۆ ئاگاهدارکرنێ داخوازا هەڤدیتنا سێیەم یا ب ئۆجالان رە بکە.
شاندە، پشتی کو ژ هەرێما کوردستانێ ڤەگەرە دێ ب هەڤسەرۆکێن دەم پارتیێ تولای هاتیمۆگوڵار و تونجەر باکرهان رە رەوشێ بنرخینە و بریارێ بدە کا دێ داخویانیێ بدە یان نا.
تەڤی کو نیقاشێن ل سەر چارەسەریا پرسگرێکا کوردان بەردەوام دکن ژی رایەدارێن دەم پارتیێ دا زانین، ئەو ژ ئەزموونێن هەتا نها دزانن کو “ئەڤ پێڤاژۆ” دێ نە ل سەر پیڤانێن دلسۆزیێ بن.
رایەدارێن پارتیێ راگهاند کو ژ بۆ خورتکرنا زەمینا دانووستاندنان، ئەو دێ هەر تشتێ پێویست بکن و د هەمان دەمێ دە دێ دەڤ ژ تێکۆشینا ل دژی دانینا قەیوومان و دەستەسەرکرنێ ژی بەردەدن.
کۆمیتەیا برێڤەبرا ناڤەندی یا دەم پارتیێ دێ 17ێ سباتێ کۆم ببە. رۆژەڤا کۆمیتەیا برێڤەبرا ناڤەندی یا دەم پارتیێ دێ ل سەر پێشنیارا هەڤسەرۆکێن گشتی وەرە دیارکرن.
