ژ بۆ شارەداریا مەزن یا وانێ قەیووم ھات دانین

ھەڤسەرۆکێ شارەداریا مەزن یا وانێ عەبدوللاھ زەیدان ژ کار ھات دوورخستن و د جیھا وی دە قەیووم ھات دانین.

وەزارەتا ناڤخوەیا ترکیێ، ھەڤسەرۆکێ شارەداریا مەزن یا وانێ یێ دەم پارتیێ عەبدوللاھ زەیدان ژ کار دوورخست و د جیھا وی دە پارێزگارێ وانێ ئۆزان بالج وەک وەکیلێ شارەداریێ ئەرکدار کر. پارێزگارێ وانێ ئۆزان بالج پشتی بریار ھات ئاشکەرا کرن دەرباسی ئاڤاھیا شارەداریێ بوو.

ڤێ دەربارێ دە وەزارەتا ناڤخوەیا ترکیێ راگەھاند:

“سەرۆکێ شارەداریا مەزن یا وانێ عەبدوللاھ زەیدان، ژ ئالیێ دادگەھا 5ێ یا سزایێن گران یا ئامەدێ ڤە ژ بەر ب دلێ خوە ئالیکاریا ئەندامتیا رێخستنا تەرۆریست کریە، 3 سال و 9 مەھان سزایێ گرتیگەھێ ژێ رە ھاتیە دایین. ژ بەر وێ ژی ژ وەک تەدبیرەکا دەمکی ژ ئالیێ وەزارەتا ناڤخوە ڤە ژ کار ھاتیە دوورخستن. پارێزگارێ وانێ ئۆزان بالج وەک وەکیلێ سەرۆکێ شارەداریێ ھاتیە ئەرکدار کرن.”