سەرۆکێ ھەرێما کوردستانێ و وەزیرێ دەرڤەیێ ترکیەیێ بھێزکرنا ھەڤکاریێن سیاسی و ئابۆری گۆتووبێژ کرن و رۆناھی خستن سەر پێشھاتێن ئەولەھی و سیاسی یێن ئیراق، سووریە و ناڤچەیێ.
سەرۆکێ ھەرێما کوردستانێ نێچیرڤان بارزانی دوھ 15ێ شوباتێ ل باژارێ مونشنێ لگەل وەزیرێ دەرڤەیێ ترکیێ ھاکان فیدان جڤیا.
د ھەڤدیتنێ دە، بەحسا پەیوەندیێن د ناڤبەرا ئیراق و ھەرێما کوردستانێ ل گەل ترکیێ دە و چاوانیا بھێزتر کرنا ھەڤکاریێن د وارێن سیاسی، ئابۆری و ئەولەکاری دە ھاتە کرن و رۆناھی ھاتە خستن ل سەر پێشھاتێن ئەولەکاری و سیاسی یێن ل ئیراق، سووریە و ناڤچەیێ.
نێچیرڤان بارزانی تەکەزی ل سەر پێشخستنا پەیوەندیێن دۆستانە د ناڤبەرا ھەرێما کوردستانێ و ترکیێ دە ل سەر بنگەھا بەرژەوەندیێن ھەڤبەش کر. ھەروھا تەکەزی ل سەر گرنگیا ھەڤکاریێن لگەل ترکیێ د ھەموو واران دە کر، ب تایبەتی د وارێ ئەولەکاری و ئارامیا ناڤچێ دە.
ژ ئالیێ خوە ڤە وەزیرێ دەرڤەیێ ترکیێ ھاکان فیدان ژی داخوازا ترکیەیێ ژ بۆ بھێزترکرنا پێوەندیێن لگەل ئیراق و ھەرێما کوردستانێ نیشان دا. ھەروھا تەکەزی ل سەر گرنگیا ھەڤاھەنگیا ھەڤبەش ژ بۆ چارەسەرکرنا کێشەیێن ئەولەھیێ و کارێ ژ بۆ بدەستخستنا ئارامی و بەختەوەریێ ل ناڤچەیێ کر.
پێشھاتێن ناڤچەیێ و رەوشا سووریەیێ و چەندین مژارێن دن یێن جھێ گرنگیا ھەڤبەش، مژارێن دن یێن ھەڤدیتنێ بوون.
