سەرۆکێ هەرێما کوردستانێ هێڤیدارە ل ڤان نێزیکان ئۆجالان گازیەکە ئاشتیێ پارڤە بکە و په‌كه‌كه ژی ل دووڤ گازیا وی بچە. هەروەسا دبێژە، «په‌ده‌كه و یه‌نه‌كه ژ بۆ پێکانینا کابینەیا دەهێ یا حکوومەتا هەرێما کوردستانێ د دانووستاندنێن جدی دە نە».
سەرۆکێ هەرێما کوردستانێ نێچیرڤان بارزانی ئیرۆ (یەکشەم، 16.02.2025) د کۆنفەرانسەکە رۆژنامەڤانی دە بەحسا تەڤلیبوونا خوە یا د کۆنفەرانسا مونشنێ دە، پێکئانینا کابینەیا دەهێ یا حکوومەتا هەرێما کوردستانێ، سەردانا شاندا ئیمرالیێ ژ بۆ هەولێرێ و چەند پرسێن دن کر.
کۆنفەرانسا مونشنێ یا ئەولەهیێ
سەرۆکێ هەرێما کوردستانێ د دەرهەقا تەڤلیبوونا خوە یا د کۆنفەرانسا مونشنێ یا ئەولەهیێ دە راگەهاند، «ئەڤ کۆنفەرانس دەرفەتەکە کو ئەم ژ نێز ڤە دانووستاندنان ل سەر داوی پێشهاتێن ئەولەهیێ یێن جیهانێ و دەڤەرێ ب سەرکردە و بەرپرسێن وەلاتان رە بکن».
نێچیرڤان بارزانی ئەشکەرە ژی کر، «ب دلخوەشی ڤە مە د دو رۆژێن بۆری دە گەلەک هەڤدیتنێن گرنگ و ببەرهەم ب سەرکردە و بەرپرسێن بلندێن وەلاتان رە هەبوون. مە هەلوەست و نەرینێن هەرێما کوردستانێ ل سەر پێشهاتێن ئەولەهیێ بەرچاڤ کرن و مە هەلوەست و نەرینێن وەلاتان ژی د ڤی واری دە وەرگرتن».
پێکئانینا کابینەیا دەهێ یا حکوومەتا هەرێما کوردستانێ
نێچیرڤان بارزانی کو هەروەسا جیگرێ سەرۆکێ پارتیا دەمۆکراتا کوردستانێ (په‌ده‌كێ یه)یە ژی ئاماژە دا، «شاندێن په‌ده‌كێ و یه‌نه‌كێ ژ بۆ پێکانینا کابینەیا دەهێ یا حکوومەتا هەرێما کوردستانێ د «دانووستاندنێن جدی دەنە و هەتا نها گەلەک هەڤدیتن د ناڤبەرا هەر دو ئالیان دا هاتنە کرن».
جیگرێ سەرۆکێ په‌ده‌كێ هەروەسا راگەهاند، «هەڤدیتنێن بەرێ یێن هەر دو شاندێن په‌ده‌كێ و یه‌نه‌كێ ل سەر وێ یەکێ بوون کا ئەم چاوا پێکڤە کار بکن. ئەگەر ئەم هەر دو د حکوومەتەکێ دە هەڤپارن، مانایا وێ هەڤپاریێ چیە؟ ئەڤ ئەو مژار بوون یێن کو ژ بۆ مە هەر دویان گرنگ بوون و پێشڤەچوونێن باش ب خوە ڤە دیتنە».
نێچیرڤان بارزانی ئاماژە ژی دا، «ئەم هێڤیدارن ئەم د دەمەکە نێزیک دە وان دانووستاندنان تەمام بکن، ژ بۆ کو د قۆناغا بێ دە بەحسا چاوانیا پارڤەکرنا پۆستێن حکوومی د ناڤبەرا په‌ده‌كێ و یه‌نه‌كێ و پێکهاتە و ئالیێن دن دە بێ کرن».
سەردانا شاندا ئیمرالیێ ژ بۆ هەرێما کوردستانێ
شاندەکە دەم پارتیێ ژ بۆ ئیمرالیێ سبەها ئیرۆ (یەکشەم، 16.02.2025) ب سەرۆکاتیا پەروین بولدان و سری سورەیا ئۆندەر گەهشت بارەگایێ بارزانی و ل سەر پرۆسەیا نوو یا ئاشتیێ ل ترکیە و باکورێ کوردستانێ ب سەرۆک بارزانی رە جڤیا.
سەرۆکێ هەرێما کوردستانێ راگەهاند کو، ئەو سبە (دوشه‌میێ، 17.02.2025) ب وێ شاندا دەم پارتیێ رە دجڤە و پێ رە دانووستاندنان ل سەر هەڤدیتنێن وان یێن ب ئۆجالان رە و پرۆسەیا نوو یا ئاشتیێ ل ترکیە و باکورێ کوردستانێ دکە.
نێچیرڤان بارزانی د دەرهەقا گازیا چاڤەرێکری یا ئۆجالان دە گۆت، «ئەم هێڤیدارن ئەم گوهداریا گازیەکە ئاشتیێ ژ ئالیێ رێزدار عه‌بدوللا ئۆجالان ڤە بکن. ئەم هێڤیدارن په‌كه‌كێ ژی هەلوەست هەبە و پێشوازیا پەیاما رێزدار ئۆجالان بکە».
جڤینا وی یا ب وەزیرێ دەرڤەیێ ئامەریکایێ رە
سەرۆکێ هەرێما کوردستانێ نێچیرڤان بارزانی پشتی نیڤرۆیا دوهی (شەمی، 15.02.2025) د بەردەوامیا بەرنامەیا خوە دە د چارچۆڤەیا کۆنفەرانسا مونشنێ یا ئەولەهیێ دە ب وەزیرێ دەرڤەیێ ئامەریکایێ مارکۆ رۆبۆ رە رە جڤیا.
نێچیرڤان بارزانی د دەرهەقا دیدارا خوە یا ل گەل وەزیرێ دەرڤەیێ ئامەریکایێ دە گۆت، «گەلەک ژ مێژ ڤە نینە کو وەزیرێ دەرڤەیێ ئامەریکایێ مارکۆ رۆبۆ دەست ب کارێ خوە کریە. مە د جڤینا خوە دە بەحسا پرسێن هەڤپارێن د ناڤبەرا ئیراق و ئامەریکایێ دە کر، هەروەسا مە تەکەز ل سەر وێ یەکێ ژی کر کو، ئیراق و هەرێما کوردستانێ دخوازن ل دەڤەرێ ببن فاکتەرێن سەقامگریێ و رۆلێ خوە بگێرن، ژ بۆ کو گرژی و ئالۆزی بەردەوام نەبن».
سەرۆکێ هەرێما کوردستانێ ئەشکەرە ژی کر، «من وەزیرێ دەرڤەیێ ئامەریکایێ ژ بۆ مەراسیمێن ڤەکرنا ئاڤاهیێ نوویێ کۆنسولخانەیا گشتی یا ئامەریکایێ ل هەولێرێ ڤەخواند، وی ژی دلخوەشیا خوە ژ بۆ تەڤلیبوونا د وان مەراسیمان دە دیار کر.»
