د چارچۆڤەیا سەردانا خوەیا بۆ ھەرێما کوردستانێ دە، شاندا دەم پارتیێ بۆ ئیمرالیێ ئیرۆ 17 شوباتێ ل ھەولێرێ سەردانا سەرۆکێ ھەرێما کوردستانێ نێچیرڤان بارزانی کر.
مژارا سەرەکەیا جڤینا نێچیرڤان بارزانی لگەل شاندا دەم پارتیێ، پێڤاژۆیا نوویا ئاشتیێ ل ترکیێ و باکورێ کوردستانێ و ئەنجامێن ھەڤدیتنێن شاندێ ل ئیمرالیێ لگەل رێبەرێ گرتی یێ پەکەکێ عەبدوللاھ ئۆجالان دبە.
سەرۆکێ ھەرێما کوردستانێ دوھ یەکشەمبێ ل باژارێ مونشنێ د جڤینەکا رۆژنامەڤانیێ دە گۆت: “ئەم ھێڤیدارین کو بانگا ئاشتیێ ژ عەبدوللاھ ئۆجالان وەرە بھیستن. ئەم ھێڤیدارن کو پەکەکە ھەلوەستێ نیشان بدە و پەیاما برێز ئۆجالان پێشوازی بکە.”
بریارە شاندا دەم پارتیێ ئیرۆ لگەل سەرۆکوەزیر مەسروور بارزانی ژی بجڤە و دەربارێ پرۆسەیا نوویا ئاشتیێ دە گۆتووبێژان بکە.
شاندا دەم پارتیێ ب سەرۆکاتیا پەرڤین بولدان و سڕی سورەیا ئۆندەر دوھ 16 شوباتێ لگەل سەرۆک بارزانی جڤیابوو و گۆتووبێژ ل سەر پێڤاژۆیا نوویا ئاشتیێ ل ترکیێ و باکورێ کوردستانێ کربوو.
د شاندەیێ دە ئەندامێن شاندەیا ئیمرالیێ پەرڤین بوولدان، سڕی ساکک، ھەڤسەرۆکێ دەبەپێ کەسکین بایندر، ئەندامێن نڤێسینگەها یاسایی یا ئاسرنێ ئۆزگور ئەرۆل و ئیبراھیم بیلمەز، ھەڤبەردەڤکێ کۆمیسیۆنا تێکلیێن دەرڤەیا دەم پارتیێ بەردان ئۆزتورک، پارلامەنتەر گولجان کاچماز سایییگیت و مەھمەت کاماچ جھ دگرن.
تێ پایین، شاندا دەم پارتیێ کو پێشتر دو جاران لگەل رێبەرێ پەکەکێ عەبدوللاھ ئۆجالان ھەڤدیتن کریە، پشتی ڤەگەرا خوە، بۆ جارا سێیەمین ژی دێ لگەل ئۆجالان ھەڤدیتنێ بکە.
