ھەڤسەرۆکێ دەبەپێ تەکەز دکە کو پێڤاژۆیا نوویا ئاشتیێ دێ ژ بۆ پاشەرۆژا گەلێ کورد پر پێویست و باش بە. ھەروھا گۆت: “ھێڤیا گەلێ کورد ب پێڤاژۆیێ ھەیە.”
د چارچۆڤەیا سەردانا خوەیا بۆ ھەرێما کوردستانێ دە، شاندا دەم پارتیێ بۆ ئیمرالیێ ئیرۆ 17 شوباتێ ل ھەولێرێ لگەل سەرۆکێ ھەرێما کوردستانێ نێچیرڤان بارزانی جڤیا.
ھەڤسەرۆکێ دەبەپێ کەسکین بایندر کو ئەندامەکی شاندا دەم پارتیێ بۆ ھەولێرێ یە، ئیرۆ 17 شوباتێ د کۆنفەرانسەکا رۆژنامەڤانی دە بەحسا ناڤەرۆکا ھەڤدیتنا لگەل سەرۆکێ ھەرێما کوردستانێ کر.
بایندر گۆت: “مە ھەڤدیتنەکا گەلەک باش و براتی لگەل سەرۆکێ ھەرێما کوردستانێ پێک ئانی. مە سلاڤێن عەبدوللاھ ئۆجالان گھاندن نێچیرڤان بارزانی. ھەروھا مە نێرین و ھەلوەستا ئۆجالان دەربارێ پرۆسەیا ئاشتیێ یا نوو دە گھاند سەرۆکێ ھەرێما کوردستانێ.”
د بەردەوامیا ئاخافتنا خوە دە گۆت: “ھەلوەستا نێچیرڤان بارزانی یا دەربارێ پێڤاژۆیا نوویا ئاشتیێ و چارەسەریا پرسا کورد ل ترکیەیێ و باکورێ کوردستانێ دە، نەتەوی بوو و تەکەزی ل سەر پشتگیریا خوەیا تەمام بۆ پرۆسەیێ کر. ژ بۆ ھەلوەست و پشتەڤانیا وی ئەم گەلەک سپاسیا وی دکن.”
ھەڤسەرۆکێ دەبەپێ گۆت ژی: “ئەگەر پێڤاژۆیا نوویا ئاشتیێ ل ترکیێ و باکورێ کوردستانێ بسەر بکەڤە، دێ ژ بۆ پێشەرۆژا گەلێ کورد گەلەکی پێویست و باش بە. ھێڤیا گەلێ کورد بۆ پێڤاژۆیەکا نوویا ئاشتیێ ھەیە و ئالیێن کوردستانی ژی ل گەل پێشکەتنا پرۆسەیێ نە.”
