نێچیرڤان بارزانی ل سەر «پێڤاژۆیا ئاشتیێ» یا ل ترکیە و باکورێ کوردستانێ گۆت، «پێڤاژۆیا ئاشتیێ دەرفەتەکە گرینگ و دیرۆکی یە و دڤێ ژ دەست نەچە».
سەرۆکێ هەرێما کوردستانێ نێچیرڤان بارزانی و هەیئەتا ئیمرالیێ ئیرۆ ل هەولێرێ ل هەڤ جڤیان.
ل گۆری داخویانیا سەرۆکاتیا هەرێما کوردستانێ، نێچیرڤان بارزانی ژ شاندەیێ رە گۆتیە: «ئەم هێڤیدارن په‌كه‌كه ب ئاوایەکی ستراتەژیک ل پێڤاژۆیێ بنێرە و دڤێ ئەڤ دەرفەت ژ دەست نەچە. مە هەر تم هەول دایە کو پێڤاژۆیا ئاشتیێ پێک وەرە و پرسگرێک ب ئاوایەکی ئاشتیانە چارەسەر ببن، ژ بەر کو تەجروبەیێ نیشان دایە شەر و چەک ت پرسگرێکان چارەسەر ناکن».
نێچیرڤان بارزانی هەموو هەڤکاری و پشتگریا خوە ژ بۆ سەرکەفتنا «پێڤاژۆیا ئاشتیێ» یا ل ترکیە و باکورێ کوردستانێ دوجارە کریە و ئانیە زمێن:
«پێڤاژۆ دەرفەتەکە گرینگ و دیرۆکی یە و پێویستە هەموو کەس ژ بۆ سەرکەفتنا پێڤاژۆیێ و براتیا کورد و ترکان بخەبتە چمکی ئاشتی ژ بۆ هەموو کەسێن ل ترکیەیێ و هەرێمێ پێویستە».
هەیئەتا ئیمرالیێ ژی سلاڤ و رێزێن تایبەتێن عه‌بدوللا ئۆجالان گهاندنە نێچیرڤان بارزانی و قالا گاڤێن پێڤاژۆیێ هاتیە کرن.
هەیئەتا ئیمرالیێ پەسنێ «هەولێن سەرۆک نێچیرڤان بارزانی یێن د پێڤاژۆیا ئاشتیێ یا بەرێ و نها دە» دایە و خوەستیە کو ئەو پشتگریا خوە بدۆمینە.
شاندەیا دەم پارتیێ یا ئیمرالیێ پشتی هەڤدیتنێن خوە یێن ب عه‌بدوللا ئۆجالان رە سەردانێن خوە ددۆمینە.
هەیئەتا ئیمرالیێ د چارچۆڤەیا ڤان هەڤدیتنان دە هات باشوورێ کوردستانێ.
هەیەت دۆهـ ب سەرۆک مەسعوود بارزانی رە جڤیابوو و ئیرۆ ژی ب سەرۆکێ هەرێما کوردستانێ نێچیرڤان بارزانی رە جڤیا.
هەیئەت دێ سبە ژی وێ هەرە سلێمانیێ و ب سەرۆکێ یەکیتیا نشتمانی یا کوردستانێ (یه‌نه‌كێ) بافل تالەبانی، جیگرێ سەرۆکوەزیر قوباد تالەبانی و رایەدارێن یه‌نه‌كێ رە بجڤە.
هەیئەت ژ پەرڤین بولدان و سڕی سورەییا ئۆندەر، هەڤسەرۆکێ ده‌به‌پێ کەسکین بایندر، ئەندامێن بورۆیا هقووقێ یا سەدسالێ ئۆزگور ئەرۆل و ئیبراهیم بلمەز، هەڤبەردەڤکێ کۆمیسیۆنا پێوەندیێن دەرڤە یا دەم پارتیێ بەردان ئۆزتورک و پارلامەنتەرێن دەم پارتیێ گولجان کاچماز سایییگیت و مەهمەت کاماچ پێک تێ.
