مەسروور بارزانی: ئەڤ سەرەدەریا ئارتێشا ئیراقێ ل بەرانبەری جۆتیاران بەرەڤاژی قانوون و دەستوورییە

نڤیسینگەها سەرۆکێ حکوومەتا هەرێما کوردستانێ ل سەر رێگرتنا ل جۆتیارێن کورد ژ ئالیێ ئارتێشا ئیراقێ ڤە دبێژە، «ئەڤ سەرەدەریا ئارتێشا ئیراقێ بەرەڤاژی دەستووری و وان بنگەهانە یێن کو ئیراقا نوو ل سەر هاتیە ئاڤاکرن».

نڤیسینگەها سەرۆکێ حکوومەتا هەرێما کوردستانێ ئیرۆ (دوشەم، 17.02.2025) راگەهاندنەک پارڤە کر کو تێ دە هاتیە، «ئیرۆ ئارتێشا ئیراقێ جارەکە دن، ل دەردۆرا کەرکووکێ و نه‌خاسمه‌ ژی گوندێ شەناخەیێ و چار گوندێن دن یێن ب سەر کۆمەلگەها سەرگەرانێ یا پارێزگەها کەرکووکێ ڤە، رێ ل جۆتیارێن کورد گرت کو بچن سەر زەڤیێن خوە».

وێ راگەهاندنێ ئاماژە ژی دایە، «ئەڤ د دەمەکێ دەیە کو، پێشڤەچوون د نەهێلانا شوونوارێن بریارێن رژێما بەرێ دە ژ بۆ گوهەرتنا دەمۆگرافیا دەڤەرێن کوردستانی یێن دەرڤەیێ ئیدارەیا هەرێما کوردستانێ و بندەستکرنا زەڤی و ملکێن خەلکێ رەسەنێ دەڤەرێ هەبوون. جڤاتا نوونەرێن ئیراقێ ژی ل مەها بۆری پرۆژەقانوونەکە گرێدایی ڤەگەراندنا ئەرد و زەڤیان ژ بۆ خوەدیێن وان یێن رەسەن پەژراند».

نڤیسینگەها سەرۆکێ حکوومەتا هەرێما کوردستانێ تەکەز ژی کریە، «ئەڤ سەرەدەریا ئارتێشا ئیراقێ بەرەڤاژی دەستوور و وان بنگەهانە یێن کو ئیراقا نوو ل سەر هاتیە ئاڤاکرن، ژ بەر کو بکارئانینا ئارتێشێ ژ بۆ ڤان مەرەمان بەرەڤاژی قانوون و دەستوورییە و دڤێ ب زووترین دەم ئەڤ سەرەدەری بێن بداویئانین بەری کو ئەنجامێن نەخوەستی ژێ چێ ببن».

ئارتێشا ئیراقێ ئیرۆ (دوشەم، 17.02.2025) ل گوندێ شەناخەیێ بزاڤ کر رێ ل جۆتیارێن کورد گرتبا کو زەڤیێن خوە کێلابان، جۆتیارێن کورد ژی رووبروویی وێ بوون و گوهـ نەدا گەفێن وێ و دەست ب کێلانا زەڤیێن خوە کر.

ئارتێشا ئیراقێ ئاماژەیێ ددە، بریار ژ وان رە هاتیە کو رێیێ ل جۆتیارێن کورد بگرن کو زەڤیێن خوە بکێلن، جۆتیارێن کورد ژی ل سەر وێ یەکێ رژدن کو زەڤیێن خوە بکێلن و ئاخا خوە بەرنەدن.