بەرەیێ کوردستانا سووریێ داخویانیەک ل سەر لھەڤکرنا ھەسەدێ، مەسەدێ و رێڤەبەریا پەیەدێ دا، ئەڤ ژی ناڤەرۆکا وێ داخویانیێ یە:
بەرەیێ کوردستانا سووریێ ژ بەر لھەڤکرنا ھێزێن سووریا دەمۆکرات (ھەسەدێ)، ئەنجوومەنا سووریا دەمۆکرات (مەسەدێ) و رێڤەبەریا پەیەدێ ب فکارە و دبینە، کو ئەو ژ مافێن نەتەوی یێن گەلێ کورد ھاتنە خوار. بەریا نھا ژی مە وەکە بەرەیێ کوردستانا سووریێ رەخنە ل کۆنفەرانسا مەسەدێ یا ل بروکسەلێ د ئۆکتۆبرا 2024 دە لدار خستبوو، کربوو، کو ب تەمامی دۆزا کورد پشتگوھ کربوو. ئیرۆ ژی ھەمان تشت پشتراست دکە کو ئەو ژ بەر داخوازێن بنگەھینێن گەلێ کورد تێنە خوار، تەنێ ژ بۆ لھەڤکرنێن کو دکەڤن بەرژەوەندیێن نە کورد.
دھاتە خوەستن بەری ھەر رێکەفتنەکێ لگەل ئالیەکێ دن، پێشی لھەڤکرنەکا کوردی-کوردی د دەربارێ داخوازێن گەلێ کورد دە چێببا، پشت را لگەل پێکھاتەیێن دن یێن کوردستانا سووریێ و لگەل حکوومەتا دەمکی ل شامێ لھەڤکرن ھاتبا کرن. تشتێ هاتیە کرن تەکەز دکە، کو چ جاران گۆتووبێژا کوردی-کوردی نە خوەستەکەکا جدی بوو ژ بۆی وان ئالیان، چ مەسەدێ، چ ھەسەدێ و چ ژی ئەنەکەسێ، ژ بەر کو ھەر ئالیەک ب تەنا سەرێ خوە و بێ ھەڤکاری ب ئالیێن کوردی یێن دن دخەبتە. ئێدی چ واتەیا ھەبوونا لھەڤکرنەکا کوردی-کوردی د پێشەرۆژێ دە نامینە، ھەیا چێکرنا شاندەکا ھەڤبەش ژ بۆ دانووستاندنێن ناڤخوە و دەرڤە.
ھەلوەستەکا مەیا نەگور د دەربارێ لخوەگرتنا پرەنسیپێن بنگەھین ژ بۆ چارەسەریا سیاسی یا پێشەرۆژێ ھەیە، ئەو ژی ئەڤ خالن:
1- سیستەما فەدەرالی وەکە بنگەھا دەستهەلاتێ ل سووریێ بهێط قەبوولکرن، کو دەستھلات و داھاتێن وەلاتی دادپەروەرانە بێنە بەلاڤکرن.
2- چەسپاندنا ھەبوونا ھەرێما کوردستانا سووریێ یا یەکگرتی، ھەروھا ژنووڤە چێکرنا نەخشەیا وێ یا رێڤەبەری ل گۆری رەوشا دەمۆگرافی.
3- دانپێدانا دەستووری ب گەلێ کورد وەک نەتەوەکا سەرەکی ل سووریێ ل رەخ نەتەوا عەرەبی، ھەروھا دانپێدانا ب کوردی وەکە زمانێ فەرمی ل رەخ عەرەبی ل تەڤاھیا سووریێ.
4- نەھشتنا سیاسەتێن عەرەبکرنێ، راکرنا ئەنجامێن کەمبەرا عەرەبی و تەڤاھیا یاسایێن ئاوارتە و وەرگەراندنا مافێن خەلکێ دەربدەر.
5- ڤەگەراندنا رەگەزنامەیێ ژ بۆ کوردێن ژێ بێپار بوونە و چارەسەرکرنا پرسا کەسێن بێ قەید. ئەم بانگ ل تەڤاھیا ھێزێن نشتمانی یێن کورد دکن ھەلوەستەکا یەکگرتی ژ بۆ مافێن مەیێن نەتەوی بگرن، کو چ ئالی ژێ نەیێ خوار. ھەروھا ئەم دبێژن ھەر رێکەفتنەک بەحسا مسۆگەرکرنا مافێن کوردان د دەستوورا سووریێ دە نەکە، دەستبەردانا ژ پرەنسیپێن بنگەھینە ژ بۆ بەرژەوەندیێن کەسایەتی و پارتیتییێن تەنگ.
بەرەیێ کوردستانا سووریێ
18/2/2025
