ئیرۆ سێشەمبێ جڤینەکا سێ ئالی د ناڤبەرا ھێزێن سووریەیا دەمۆکراتیک (ھەسەدێ)، مەجلسا سووریەیا دەمۆکراتیک (مەسەدێ) و رێڤەبەریا خوەسەرا باکور و رۆژھلاتێ سووریێ کو ناڤچەیێن بەرفرەھ ل باکور و رۆژھلاتێ سووریێ کۆنترۆل دکە ھات لدارخستن و د ئەنجامێ دە چەند رێکەفتن ل سەر ھەماھەنگیا لگەل حکوومەتا سووریێ ل شامێ ھاتن ئەنجامدان.
سەرکردەیەکی ھێزێن سووریا دەمۆکراتیک (ھەسەدێ) تەکەز کر، د پێنگاڤەکێ دە ژ بۆ بھێزکرنا ھەڤکاریا لەشکەری د ناڤبەرا ھەردو ئالیان دە، جڤین ب یەکخستنا ھێزێن سووریا دەمۆکراتیک (ھەسەدێ) و سازیێن ئەولەھیێ یێن گرێدایی رێڤەبەریا خوەسەر د چارچۆڤەیا ئارتێشا سووریێ دە ب داوی ھات. ھەر وھا ل ھەڤ کرن کو سازیێن سڤیل و خزمەتگوزارییێن گرێدایی دەولەتێ ل ھەرێمێن باکور و رۆژھلاتێ سووریێ ژ نوو ڤە بێن ئاکتیفکرن، ب ئاوایەکی کو ببە ئالیکار ژ بۆ باشترکرنا شەرت و مەرجێن ژیانێ و خزمەتگوزاریا گەل.
ئالیێن جڤینێ تەکەزی ل سەر وێ یەکێ کر کو د چارچۆڤەیا ھەولێن کۆنترۆلکرنا رەوشا ئەولەھیێ دە پێویستە ھەموو چەکدارێن نە سووری ژ ناڤ رەفێن ھەسەدێ و ھەرێما باکور و رۆژھلاتێ سووریێ ڤەکشن. ھەر وھا بریار ھات دایین کو د چارچۆڤەیا ھەولێن پێکانینا ئارامیێ ل ھەرێمێ جڤین و ھەماھەنگیا ل گەل حکوومەتا سووریێ ل شامێ بهێتە زێدەکرن ژ بۆ زێدەکرنا ھەڤکاریێ د مژارێن نیشتیمانی و ئاسانکرنا ڤەگەرا ئاوارە و کۆچبەران بۆ باژار و گوندێن خوە.
ل گور ئاگاهیان د ڤێ جڤینا سێ ئالی دە ب ئاوایەکی گشتی رێکەفتن ل سەر ڤان خالان هاتیە کرن:
1- یەکخستنا ھێزێن سووریا دەمۆکراتیک (ھەسەدێ) و سازیێن ئەولەھیێ یێن گرێدایی رێڤەبەریا خوەسەر د چارچۆڤەیا ئارتێشا سووریێ دە ب ئارمانجا یەککرنا ھەولان و خورتکرنا ھێزا نەتەوەیی.
2- ژ نوو ڤە ئەکتیڤکرنا سازیێن سڤیل، بەشداران ل ھەڤ کرن کو سازیێن سڤیل و خزمەتگوزارییێن گرێدایی دەولەتێ ل باکور و رۆژھلاتێ سووریێ ژ نوو ڤە بێن ئەکتیڤکرن، ژ بۆ پەیداکرنا خزمەتگوزاریێن بنگەھین و باشترکرنا ئاستا ژیانا خەلکێ.
3- ڤێکشینا چەکدارێن بیانی، تەکەزی ل سەر پێویستیا ڤەکشاندنا ھەموو چەکدارێن نە-سووری ژ ناڤ رەفێن ھێزێن سووریا دەمۆکراتیک و ھەرێمێن باکور و رۆژھلاتێ سووریێ ھاتە کرن، وەکە پێنگاڤەک ژ بۆ بھێزکرنا سەروەری و ئارامیا نیشتیمانی.
4- زێدەکرنا ھەماھەنگیێ لگەل حکوومەتا سووریێ، هەسەدێ، مەسەدێ و رێڤەبەریا خوەسەر لھەڤ کرن کو جڤین و ھەڤاھەنگیا لگەل حکوومەتا سووریێ ل شامێ بهێت خورتکرن ژ بۆ پێشخستنا ھەڤکاریێ د مژارێن نەتەوەیی دە.
5- تەکەزی ل سەر یەکپارچەییا سووریێ هات کرن، تەکەزی ل سەر گرنگیا یەکپارچەییا خاکا سووریێ ھات کرن و هات راگهاندن تێکەلبوونا ھێزێن خوەجھی د ناڤ ئارتێشا سووریێ دە دێ شیانێن وێ د پاراستنا خاکا سووریێ دە زێدەتر بکە.
6- ڤەگەرا ئاوارەیان، رێکەفتن ھات کرن کو ژ بۆ ڤەگەراندنا ئاوارە و کۆچبەران بۆ باژار و گوندێن وان ئاسان ببە کارئاسانی بێن کرن، د ھەمان دەمێ دە پێویستە مەرجێن گونجاو ژ بۆ ژیانا وان بێن دابین کرن.
7- پیرۆزباھی و ڤەخواندنا ئەحمەد ئەل-شەرع، ب ھەلکەفتا دەستبکاربوونا ئەحمەد ئەل-شەرع وەکە سەرۆک پیرۆزباھی ل ئەحمەد ئەل-شەرع ھاتە کرن و ژ بۆ بھێزکرنا پێوەندیان ب ڤەخوەندنەکە فەرمی داخواز ژێ هات کرن کو سەردانا باکور و رۆژھلاتێ سووریێ بکە.
8- میکانیزما جیبجیکرنا خالێن رێکەفتن ل سەر هاتیە کرن، ژ ھەموو ئالیان کۆمیتەیێن ھەڤبەش ھاتن ئاڤاکرن ژ بۆ پێشخستنا پلان و میکانیزمایێن جیبجیکرنێ ژ بۆ ئەنجامدانا ب باندۆر یا خالێن رێکەفتن ل سەر هاتیە کرن.
