فەرماندارێ هێزێن هەڤپەیمانان ل ئیراقێ رادگەهینە، «بزاڤێن هەڤپەیمانان ب نیەتا زێدەتر پێشڤەبرن و کارکرنا ژ بۆ پرۆسەیا چاکسازیێ ب هەڤاهەنگی ب وەزارەتا پێشمەرگە رە بەردەوام دبن».
جیگرێ سەرۆکئەر‌کانێ وەزارەتا پێشمەرگە ژ بۆ ئیدارە و میرە لیوا روکن هۆشمەند حەیدەر رەشید دوهی (سێشەم، 18.02.2025) پێشوازیا فەرماندارێ گشتییێ هێزێن هەڤپەیمانان ل ئیراقێ گەنەرال هام و تیما پێ رە کر.
ل دوو راگەهاندنا وەزارەتا پێشمەرگە، د وێ جڤینێ دە دانووستاندن ل سەر کارووبارێن فرقەیان و بجهانینا بەرنامە و پلانێن چاکسازیێ ل وەزارەتا پێشمەرگە و رێکخستنا تەڤایا هێزان هات کرن، هەروەسا رەوشا نها یا هێزا پێشمەرگە و پێشخستنا پەیوەندیێن ناڤبەرا وەزارەتا پێشمەرگە و هەڤپەیمانان ژی هاتن بەحسکرن.
هەر دو ئالی د وێ جڤینێ دە ل سەر بلەزکرنا پێنگاڤان ب نیەتا یەککرنا یەکینەیێن جودا ژ بۆ سەر وەزارەتا پێشمەرگە و رکخستنا وان د چارچۆڤەیا فرقەیان دە هەڤنەرین بوون.
گەنەرال هام دلخوەشیا خوە ژ بۆ گاڤێن وەزارەتا پێشمەرگە د پرۆسەیا چاکسازیا هێزان دە دیار کر و ئاماژە دا، «بزاڤێن هەڤپەیمانان ب نیەتا زێدەتر پێشڤەبرن و کارکرنا ژ بۆ پرۆسەیا چاکسازیێ ب هەڤاهەنگی ب وەزارەتا پێشمەرگە رە بەردەوام دبن».
ناڤبری ب گرنگی ڤە بەحسا پرس و پرۆسەیا چاکسازیێ ل وەزارەتا پێشمەرگە کر و راگەهاند، «ئەم ل سەر رێکخستن و یەککرنا هێزا پێشمەرگەیێ کوردستانێ و پێکانینا زێدەتر فرقەیان و سەرکرداتیا دەڤەرێ ب پشتەڤانیا لۆژستی و ئالیکاری و هەڤاهەنگیا شێورمەند و دیپلۆماتکارێن هەڤپەیمانان ل هەرێما کوردستانێ و ئیراقێ بەردەوامن».
