ھەولێر و بەغدا ل سەر ھناردەکرنا پەترۆلا کوردستانێ لھەڤ کرن و کۆمیتەیەک ژی ژ بۆ کۆنترۆلکرنا بۆریان ھاتیە ئاڤاکرن.
شاندا دانووستاندنان یا حکوومەتا ھەرێما کوردستانێ راگھاند، ئیرۆ 23/2/2025 پشتی پێوەندی و ھەڤاھەنگیا د ناڤبەرا وەزارەتا پەترۆلێ یا ئیراقێ و وەزارەتا سامانێن سروویشتی یا ھەرێما کوردستانێ دە، رێکەفتن ھات کرن کو ل گۆری رێژەیا بەردەست، ھناردەکرنا پەترۆلێ ژ نوو ڤە دەست پێ بکە.
ل گۆری داخویانیا شاندا دانووستاندنکارا حکوومەتا ھەرێما کوردستانێ، تیمەکا تەکنیکی یا ھەڤبەش ژ بۆ کۆنترۆلکرنا بۆریێن ھناردەکرنا پەترۆلا کوردستانێ د ناڤبەرا ھەر دو ئالیان دە ھاتیە ئاڤاکرن.
د داخویانیێ دە ھات گۆتن: “د ڤی واری دە ئەم سۆزا بجھانینا بەندێن یاسایا بودجەیا گشتی یا فەدەرال تەکەز دکن.”
ئەڤ د دەمەکێ دەیە، وەزارەتا پەترۆلێ یا ئیراقێ دوھ شەمبیێ راگھاندبوو، ھەموو رێکارێن ژ بۆ دوبارە ھناردەکرنا پەترۆلا کوردستانێ ب رێیا بەندەرا جەیھانێ یا ترکیەیێ تەمام بوونە.
پێشتر ئاژانسا “رویتەرس” ل سەر زارێ 8 ژێدەرێن جودا بەلاڤ کربوو، رێڤەبەریا دۆنالد ترومپ ھشیاری دایە ئیراقێ کو د زووترین دەم دە دەست ب ھناردەکرنا پەترۆلا ھەرێما کوردستانێ بکە.
نێزیکی 2 سالانە ھناردەکرنا پەترۆلا کوردستانێ ھاتیە راوەستاندن و بوویە سەدەما زیانا 26 ملیار دۆلاران ژ بۆ ئابۆریا ئیراق و کوردستانێ و نەھەڤسەنگیا بازارا جیھانی یا ئەنەرژیێ.
