دەم پارتیێ دانینا قەیووم ل شارەداریا قاخزمانێ شەرمەزار کر و گۆت: «قەیووم، شەرێ ئاک پارتیێ یێ ل دژی مافێ بژارتن و هلبژارتنێ یێ گەلانە».
پشتی کو جەزایا زیندانێ ل هەڤشارەدارێ قاخزمانێ هاتبوو برین، وەزارەتا ناڤخوە یا ترکیەیێ ئیرۆ 24ێ سباتێ قەیووم ژ بۆ شارەداریا قاخزمانێ یا دەم پارتیێ دانی.
پارتیا وەکهەڤی و دەمۆکراسیێ یا گەلان (دەم پارتی) ل هەژمارا خوە یا تۆرا جڤاکی داخویانیەک دەربارێ دانینا قەیووم ل سەر شارەداریا قاخزمانا قەرسێ بەلاڤ کر.
دەم پارتیێ د داخویانیا خوە دە گۆت، کەسێن ژ ئیرادەیا گەل دترسن دیسا د دەورێ دە نە. تایینکرنا قەیووما ل شارەداریا قاخزمانا قەرسێ، شەرێ دەستهلاتداریا ئاک پارتیێ یێ ل دژی مافێ بژارتن و هلبژارتنێ یێ گەلانە.
هەروها گۆت: «شارەداریا مە خزمەت ژ گەل رە کر و پەرگالا نەلرێتیێ سەر و بن کر، لەوما هەدەف هاتە گرتن. لێ بەلێ، نە ئەم، نە ژی گەلێن مە، دێ تایینكرنا قەیوومان قەبوول نەکە. ئەم ڤێ ب كۆده‌تایا دژی دەمۆکراسیێ، ل دژی ئیرادەیا گەل و ل دژی هەڤشارەدارێن هلبژارتی ب تو ئاوایی قەبوول ناکن. دێ پەرگالا قەیووم تێک بچە و گەل ب سەر کەڤە».
