ھەڤسەرۆکێ گشتی یێ دەم پارتیێ دیار کر، سەرۆک مەسعوود بارزانی د ھەڤدیتنا لگەل شاندا ئیمرالیێ دە گۆت کو ئەو پشتگریەکا مەزن ددن نێرینا چارەسەریێ یا ئۆجالان.
ھەڤسەرۆکێ گشتی یێ پارتیا وەکھەڤی و دەمۆکراسیێ یا گەلان (دەم پارتی) تونجەر باکرھان د جڤینا کۆما پارتیا خوە دە ل مەجلسێ ئاخڤی و گەشەدانێن د رۆژەڤێ دە نرخاندن.
باکرھان دانینا قەیومان ل سەر شارەداریان شەرمەزار کر و گۆت: “ل ھەر چار ئالیێن جیھانێ ئەم ل رێ و رێبازێن ئاشتیێ دگەرن، لێ ئەو ھێژ ژی قەیوومان تەعیین دکن. ما دێ ئەڤ زیھنیەتا خوەسەپین و ئینکارکەر ھەتا کو بدۆمە؟”
دەربارێ پێڤاژۆیا نوو دە ژی گۆت: “ئەم د قۆناغا دەستپێکەکا نوو دە نە کو دێ قەدەرا گەلێن ترکیێ و رۆژھلاتا ناڤین بگوھەرینن. دێ باندۆرێ ل دەھان سالێن مە تەڤان بکن.”
ھەروھا گۆت: “ئەم دکارن دەست ب سەدسالەکا نوویا دەمۆکراتیک بکن. ھەکە ھندەک ژدل بن، دێ د رۆژێن پێش دە ئەڤ مژار ببن مژارێن سەرەکی یێن ترکیەیێ. ئەم دکارین ترکیەیەکا رەنگین ئاڤا بکن. ئەم ژ بۆ ڤێ تێدکۆشن.”
ھەڤسەرۆکێ گشتی یێ دەم پارتیێ ل سەر رۆل و ھەلوەستا سەرۆک بارزانی ژی گۆت: “ل ھەرێما فەدەرال یا کوردستانێ ھەڤدیتنێن ئەرێنی ھاتن کرن…یا ھەری گرینگ ژی ئەو بوو کو ژ لیدەرێن گرینگێن گەلێ کورد برێز مەسعوود بارزانی د ھەڤدیتنێ دە گۆت کو ئەو پشتگریەکا مەزن ددن نێرینا چارەسەریێ یا برێز ئۆجالان. ئەڤ، سەکنەکە دیرۆکییە. کورد ب ھەڤ رە نە.”
