رۆژا 21ێ شوباتێ ل گوندێ گۆھەرزێ یێ سەر ب ناحیا دێرالۆکا ئامادیێ ڤە د ئەنجاما شەر و پەڤچوونا د ناڤبەرا ھێزێن چەکدارێن ترکیێ و پەکەکێ دە 3 ئەندامێن پەکەکێ ژیانا خوە ژ دەست دابوون. پشتی بوویەرێ مەدیایا یەنەکێ و پەکەکێ ل سەر تۆرێن جڤاکی خەلکێ گۆھەرزێ و ئاسایشا ھەرێما کوردستانێ ب ڤێ بوویەرێ تاوانبار کرن. ھەپەگێ ئیرۆ ل سەر مژارێ داخویانیەک دا.
پشتی بوویەرا کو د 21ێ شوباتێ دە 3 ئەندامێن ھەپەگێ ژیانا خوە ژ دەست دابوون، گەلێ گۆھەرزێ ژ ئالیێ چاپەمەنیا پەکەکێ و یەنەکێ ڤە ب خیانەتێ و ئێخبارکرنا وان گەریلایان ھاتن تاوانبارکرن. ھەر وھا ئەندامێن پەکەکێ ب تایبەت ئەندامێ کۆمیتەیا چاپەمەنیا پەکەکێ ئامەد دیجلە ژی خوەستن کو ڤێ بوویەرێ بخن ستوویێ خەلکێ گوهەرزێ و ئاژانسا پاراستنا ھەرێما کوردستانێ. ڤان دەزگەھێن چاپەمەنیێ دەربارێ مژارێ ڤیدیۆیێن ھەستیار چێکرن و گەلێ گوھەرزێ ئارمانج کرن. ل سەر ڤێ یەکێ جڤاتا گوندێ گوھەرزێ د 23عێ شوباتێ دە داخویانیەک دا و دیار کر کو ئەو دێ ل دژی وان کەسێن تومەتان ددن پال خەلکێ گوهەرزێ سکالایا یاسایی تۆمار بکن و ژ پەکەکێ و ھێزێن چەکدارێن ترک ژی خوەست کو شەرێ خوە ژ گوندێ وان دوور بخن. پشتی داخویانیا گەلێ گوھەرزێ و کارڤەدانێن ل سەر مەدیایا جڤاکی، ھەپەگێ ئیرۆ داخویانیەک دا.
ھەپەگێ وھا گۆت: “ھاتە تەسپیتکرن، یێن کو ل نێزیکی گوندێ گوھەرزێ د 21عێ شوباتێ دە کەمین دانین پێشیا ھەڤالێن مە، تیمەکە کۆنترا یا تایبەت یا ھێزێن دەولەتا ترکە. د ڤێ بوویەرێ دە رۆلا خەلکێ گوھەرزێ نینە.”
تێ تەخمینکرن کو ھەپەگێ تەڤی گۆتنێن بەرێ ژی ژ بەر کارڤەدانێن خەلکێ گوھەرزێ ئەڤ داخویانی دابە. ژ بەر ڤێ یەکێ ھەموو داخویانیێن پەکەکێ یێن کو ھەتا نھا دەربارێ بوویەرێ دە ھاتنە دایین، ڤالا دەرکەتن.
ھەر وھا دەردۆرێن پەکەکێ تێکلداری بوویەرێ ژ بۆ کو یەکیتیا گەلێ گوھەرزێ خەراب بکن و وان ل دژی ھەڤ دەرخینن موختار و ھندەک خەلکێ گوند ب زانەبوون ئارمانج کرن. ب داخویانیا ھەپەگێ هەولدانێن کەسێن کو دخوەستن گەلێ گوھەرزێ ل ھەمبەری ھەڤ دەرخینن، ڤالا دەرکەتن.
ل گۆر زانیاریێن مەیدانێ، ھەر سێ گەریلایێن پەکەکێ ئەندامێن وێ کۆما گەریلا نە کو د تونەلا پەکەکێ یا ب ناڤێ گرێ بھار دە کو دکەڤە چیایێ هنداڤی گوندێ گوهەرزێ ھاتیە دۆرپێچکرن. دەما کو ئەڤ سێ گەریلایە ب شەڤ ژ تونەلێ دەرکەتنە لەشکەرێ ترکیەیێ ئەو شۆپاندنە هەیا گهشتنە دەردۆرا گوندێ گوهەرزێ، ئانکو لەشکەرێ ترکیەیێ ب خوە تەڤ ئاگاهی ل سەر وان گەریلایان ب دەست خستنە و ئەو ئارمانج کرنە. بەلێ، د ئەنجاما پۆلیتیکایا تونەلێ یا پەکەکێ دە 3 گەریلایێن کو دھاتە تەخمینکرن ل وێ هەرێمێ شارەزا نینە و د پەڤچوونێ دە چ گولە نە بەردانە لەشکەرێ ترک، ژیانا خوە ژ دەست دانە.
گەلێ گوھەرزێ یێ کو کەدێن مەزن د تێکۆشینا نەتەوەیی یا کوردستانێ دە دانە، گەلێن خوەدی شەھید و پێشمەرگە نە. پشتی کو پەکەکە ل دەردۆرا گوندێ گوهەرزێ ب جھ بووی، ھێزێن چەکدارێن ترکیەیێ ھاتن ھەرێمێ. ژ بەر کو پەکەکێ رێ نەدا ھێزێن پێشمەرگە ل دەردۆرا گوندی ب جھ ببن، ھێزێن چەکدارێن ترکیێ 750 مەتران دووری گوندی خالەکا لەشکەری ئاڤا کرن. گوندێ گوهەرزێ ژ سالا 2021 ڤە د ناڤبەرا دو ئاگران دەیە.
