تەڤگەرا ژنێن ئازاد (TJA)، پارتیا ھەرێمێن دەمۆکراتیک (DBP) و پارتیا وەکھەڤی و دەمۆکراسیێ یا گەلان (دەم پارتی) بەریا بانگا چاڤەرێکری یا رێبەرێ پەکەکێ عەبدوللاھ ئۆجالان، کو دێ پشتی ھەڤدیتنا ئیرۆیا لگەل شاندەیا دەم پارتیێ وەرە کرن، ل ئاڤاھیا رێخستنا دەم پارتیێ یا دیاربەکر داخویانیەک دان.
ھەڤسەرۆکا رێخستنا دەم پارتیێ یا دیاربەکرێ گولشەن ئۆزەر بانگ ل وەلاتیێن باژێر کر کو ئیرۆ 27/2/2025 دانێ ئێڤارێ ل مەیدانا شێخ سەعید یا ناڤەندا باژێری کۆم ببن و ب ھەڤ رە ل پەیاما عەبدوللاھ ئۆجالان یا ل سەر پێڤاژۆیا نوویا ئاشتیێ گوھداری بکن.
ھەروھا گۆت: “عەبدوللاھ ئۆجالان د پەیاما خوە دە، نێرین و پێشنیارێن خوەیێن ل سەر چارەسەریا پرسا کورد ب گشتی پێشکێش دکە و چ بێژە و داخواز بکە، ئەم دێ پابەند بن.”
تەکەز کر ژی: “گەلێ کورد ل ھەر چار پارچەیێن کوردستانێ و تەڤاھیا جیھانێ ل بەندا پەیاما دیرۆکی یا ئۆجالانن کو ژ بۆ ئاشتی، ئەولەھی و ئارامیا ناڤچەیێ گەلەکی گرینگە.”
شاندا ئیمرالیێ یا پارتیا وەکھەڤی و دەمۆکراسیێ یا گەلان (دەم پارتی) ئیرۆ ل گرتیگەھا تیپا F یا ب ئەولەکاریا بلندا ئیمرالیێ لگەل رێبەرێ پەکەکێ عەبدوللاھ ئۆجالان ھەڤدیتنا سێیەمین دکە.
