سەرۆکوەزیرێ هەرێما کوردستانێ پەیامەک بەلاڤ کر و تێ دە راگهاند، ئەو پێشوازیێ ل هەر هەولەکە بۆ چارەسەرکرنا ئاشتیانە یا کێشەیێن ناڤچەیێ دکن و پشتەڤانیا وان دکن.
سەرۆکوەزیر مەسروور بارزانی دوهـ 27ێ سباتێ پەیامەک بەلاڤ کر و تێ دە راگهاند، «ئەز پێشوازیێ ل هەر هەولەکێ دکم ژ بۆ چارەسەرکرنا پرسگرێکێن ل ناڤچەیێ ب ئاوایەکی ئاشتیانە».
سەرۆکوەزیر مەسروور بارزانی تەکەز کر، «هەرێما کوردستانێ هەرتم فاکتۆرەکە گرینگا ئارامی و ئاساییشا ناڤچەیێ بوویە و د ڤی واری دە ئەم ئامادەبوونا خوە ژ بۆ هەر هەڤکاری و رۆلەکێ د سەرکەفتنا پێڤاژۆیا ئاشتیێ ل ترکیەیێ دە رادگهینن».
ئەڤ داخویانیا سەرۆکوەزیرێ هەرێما کوردستانێ پشتی وێ تێ، شاندەیا ئیمرالیێ یا دەم پارتیێ دوهـ بۆ جارا سێیەمین ل گرتیگەها گراڤا ئیمرالیێ ب رێبەرێ په‌كه‌كێ عه‌بدوللا ئۆجالان رە هەڤدیتن کر و پشترە ژی د کۆنفەرانسەکە رۆژنامەڤانی بانگا ئۆجالان ژ رایا گشتی رە راگهاند.
ئۆجالان د بانگا خوە دە گۆت؛ «بانگا کو برێز دەڤلەت باهچەلی کر، ئیرادەیا کو برێز سەرۆککۆمار نیشان دا و نێزیکاتیێن ئەرێنی یێن پارتیێن دن ئەڤ پێڤاژۆ ئاڤا کر و ئەز ژی د ڤێ پێڤاژۆیێ دە بانگا چەکدانینێ دکم و ئەز بەرپرسیاریا دیرۆکی یا ڤێ بانگێ دگرم سەر خوە.
هەروها ئۆجالان گۆت ژی: «چاوا کو هەر جڤاک و پارتیا هەمدەم کو هەبوونا وێ ب دارێ زۆرێ نەهاتیە بداویکرن، هوون ژی ب دلخوازی کۆنگرەیا خوە بجڤینن و بریاران بدن؛ دڤێ هەموو کۆم چەکێن خوە دەینن و په‌كه‌كه خوە فەسهـ بکە. ئەز سلاڤێن خوە ژ هەموو کەسان رە دشینم کو ب ژیانا هەڤپار باوەر دکن و گوهـ ددن بانگا من».
