کۆلبەرەکی کورد ژ ئالیێ ھێزێن ئیرانێ ڤە ھات کوشتن

کۆمەلەیا مافێ مرۆڤان (ھەنگاو) راگھاند، کۆلبەرەکی کورد ب گولـلەیێن راستەراست یێن ھێزێن ئیرانێ، ل سینۆرێ قەسرا شرینێ ھاتە کوشتن.

ھەنگاوێ ب داخویانیەکێ راگەھاند: “کۆلبەرەکی خەلکێ سەرپێلا زەھاوێ ب ناڤێ شەھنام زاھیری نژاد، دوھ ژ بەر گولـلەیێن راستەراست یێن ھێزێن سوپایێ پاسدارێن ئیرانێ ل سینۆرێ قەسرا شرینێ یا سەر ب پارێزگەھا کرماشانێ ڤە جانێ خوە ژدەست دا.”

ل گۆری راپۆرتا گەھەشتیە ھەنگاوێ، شەھنام زاھیری نژاد 35 سالییە، زەوجی بوو و بابێ 3 زارۆکان بوویە.

ھەژمارەک ژ خەلکێ رۆژھلاتێ کوردستانێ، ژ بۆ دابینکرنا دەبارا ژیانا خوە، ب رێیێن دژوار و چیایی، تێنە سەر سینۆرێن ھەرێما کوردستانێ و کارێ ڤەگوھەستنا کەلووپەلان دکن، لێ بەلێ سالانە ھەژمارەک ژ وان ب گولـلەیێن ھێزێن سوپایێ پاسدارێن ئیرانێ تێن کوشتن و بریندارکرن.

ل گۆری ئامارێن “کۆلبەرنیوز”، تەنێ د سالا 2024 دە ل سەر سینۆرێن د ناڤبەرا باشوور و رۆژھلاتێ کوردستانێ دە، 59 کۆلبەر ھاتنە کوشتن و 286 کۆلبەر ژی بریندار بوونە.