پارتیا وەلاتپارێزێن کوردستانێ (PWK) رۆژا 1/3/2025، ب مناسبەتا 46ەمین سالڤەگەرا کۆچا داویێ یا مەلا مستەفا بارزانییێ نەمر، ل ستەنبۆلێ کۆنفەرانسا ببیرانینێ لدار خست.
نڤێسینگەها راگەھاندنێ یا د داخویانیەکێ دە راگھاند، د دەستپێکا کۆنفەرانسێ دە سییاسەتمەدارێ کورد، ئەندامێ رێڤەبرییا PWK یا ستەنبۆلێ عەبدولمەجید کاپازان بخێرھاتنا بەشداران کر و ژ بۆ شەھیدێن کوردستانێ رێز ھاتە گرتن.
عەبدولمەجید کاپازان د دەربارێ ئارمانجا کۆنفەرانسێ دە ئاگاھداری دا.
پاشێ ئەندامێ کۆمیتەیا برێڤەبرا ناڤەندی یا PWK قاسم ئەرگون بەحسا ژییان، تێکۆشین و خەباتا مەلا مستەفا بارزانییێ نەمر کر، ئیرۆ ل ھەر چار پەرچەیێن کوردستانێ گرینگییا فکر و رێبازا جەنابێ وی ئانی زمان. قاسم ئەرگون، ھەر وەھا د دەربارێ پێڤاژۆیا کو ئیرۆ ھەر چار پەرچەیێن کوردستانێ تێ دە دەرباس دبن دە، بیر و رای و پێشنیارێن PWK پێشکێش کر.
بەرپرسێ تەڤگەرا ئازادییا کوردستان-سووریێ و سەرۆکێ هەز-کوردێ سبحی ئۆزگەن د دەربارێ رۆلا مەلا مستەفا بارزانییێ نەمریا د دۆزا ئازادییا کوردستانێ دە ئاخافتن. بەشدارەکی ژی ھەلبەستەک د دەربارێ مەلا مستەفا بارزانییێ نەمر دە خوەند.
نوونەرێن تەڤگەرا ئازادییا کوردستان-سووری، ھەز-کورد و پلاتفۆرما جوانێن سەربخوە، ئەندام و رێڤەبرێن PWK و سییاسەتمەدار و رەوشەنبیرێن کورد بەشداری کۆنفەرانسا ببیرانینێ بوون.
