بەردەڤکێ لژنەیا پەترۆل و گازێ یا جڤاتا نوونەرێن ئیراقێ راگەهاند، «هەمی ئامادەکاریێن هناردەکرنا پەترۆلا هەرێما کوردستانێ هاتنە تەمامکرن».
بەردەڤکێ لژنەیا پەترۆل و گازێ یا جڤاتا نوونەرێن ئیراقێ ئەلی شەداد د دەرهەقا دەستپێکرنا هناردەکرنا پەترۆلا هەرێما کوردستانێ ژ بۆ بەندەرێ جەیهانێیێ ترکیەیێ دە گۆت، «چ بەربەست نەمانە و هەمی ئامادەکاری ژ بۆ وێ پرۆسەیێ هاتنە کرن. ل دوو ڕاستڤه‌كرنا بودجەیێ ژی، ئەو هەژمارا ژ هەرێما کوردستانێ تێ شاندن د ناڤبەرا 300 هەتا 325 هەزار بەرمیلێن پەترۆلێ دەنە».
بەردەڤکێ لژنەیا پەترۆل و گازێ یا جڤاتا نوونەرێن ئیراقێ ئاماژە ژی دا، «هەرێما کوردستانێ داخواز کریە کو هەژمارا پەترۆلا بکارینایی ل هوندر ژ هەر رۆژێ 45 هەزار بەرمیلێن پەترۆلێ ببە هەر رۆژێ 110 هەزار بەرمیلێن پەترۆلێ».
وەزیرێ پەترۆلێ یێ ئیراقێ هەیان عەبدولغەنی ژی ل رۆژا ئینێ (28.02.2025) راگەهاند، «د پێنگاڤا یەکێ دە، کۆمپانیا بەربازارکرنا پەترۆلا فەدەرالی (سۆمۆ) هەر رۆژێ 185 هەزار بەرمیلێن پەترۆلێ ب رێیا بەندەرێ جەیهانێ یێ ترکیەیێ دفرۆشە، هەتا پێنگاڤ پێنگاڤ دگەهە وێ هەژمارێ یا کو د بودجەیا گشتی یا فەدەرالی دە ئاماژە پێ هاتیە دان».
وەزیرێ دەرڤەیێ ئامەریکایێ مارکۆ رۆبۆ و سەرۆکوەزیرێ ئیراقێ محەمەد شه‌یاع سوودانی ل رۆژا سێشەمێ (25.02.2025) د پەیوەندیەکە تلەفۆنی دە دانوستاندن ل سەر رەوشا سووریە و دەڤەرێ، کۆمێن چەکدار، هناردەکرنا پەترۆلا هەرێما کوردستانێ و هەژمارەکە پرسێن دن کرن.
ل دوو راگەهاندنا وەزارەتا دەرڤە یا ئامەریکایێ، د وێ پەیوەندیا تێلەفوونی دە رۆبۆ ئاماژە دایە کو، دڤێ ب زووترین دەم پەترۆلا هەرێما کوردستانێ ب رێیا بۆریا ئیراق – ترکیەیێ بێ هناردەکرن و رێز ل پەیمانێن پەترۆلێ یێن کۆمپانیێن ئامەریکایی بێ گرتن، کو ل هەرێما کوردستانێ و ئیراقێ کار دکن.
هناردەکرنا پەترۆلا هەرێما کوردستانێ ب رێیا بەندەرێ جەیهانێ ژ ئادارا سالا 2023ێ ڤە هاتیە راوەستاندن، ئەو ژی پشتی بریارەکە دادگەها ناڤبژیڤانیێ یا ناڤدەولەتی ل پاریسێ هات، کو د بەرژەوەندیا حکوومەتا ئیراقێ یا فەدەرالی دە بریار دا.
ل دوو ئاماران، ژ وێ رۆژێ ڤە کو هناردەکرنا پەترۆلا هەرێما کوردستانێ هاتیە راوەستاندن، هەتا نها زێدەتری 21 ملیار دۆلاران زرارا دارایی گەهشتیە گەنجینەیا حکوومەتا ئیراقێ.
