ل سەر بانگا سەرۆکێ پەکەکێ عەبدوللاھ ئۆجالان، داخویانیێن ژ پێکھاتەیێن جودایێن رێخستنێ دەوام دکن.
پژاک، باسکێ ئیرانێ یێ پەکەکێ ژی راگھاند کو ئەو پشتگریێ ددن ڤێ بانگێ. ھەڤسەرۆکێ بەرێ یێ یەپەگێ/پەیەدێ سالح موسلم ژی گۆت، “ئەم بانگا ئۆجالان دپەژرینن. ئەگەر دەستوور بێ دایین کو ئەم وەکە کۆمەکا سیاسی تەڤبگەرن، ئەم دێ دەست ژ چەکان بەردن” و سەرۆکێ ھێزێن سووریەیا دەمۆکراتیک مەزلووم عەبدی ژی گۆت کو ئەڤ بانگ ل وان نایێ کرن. بەرسڤا فەرماندارێ ھەسەدێ مەزلووم عەبدی ژ سڕی سورەییا ئۆندەر ھات پرسین. ئۆندەر گۆت، “د پرەنسیبێ دە ھەر کەسی ڤەدحەوینە. ستراکچەرا یەپەگێ ژی ئاڤاھیەکە کو ب ئیلھاما ئۆجالان دەرکەتیە ھۆلێ. چەک تێن ئاستەنگکرن. ئەڤ ژ بۆ ھەرکەسەکی دەرباس دبە.”
پشتی داخویانیا ئۆجالان یا ژ بۆ پەکەکێ یا کو گۆتی “دەست ژ چەکان بەردن و بلا پەکەکە خوە هلوەشینە” چاڤێ ھەموویان کەت سەر گاڤێن کو بێنە ئاڤێتن. پارلامەنتەرێ دەمێ یێ ستەنبۆلێ سڕی سورەییا ئۆندەر ژی گۆت، “قۆناغا یەکەمین ب سەرکەتی ب داوی بوو. ئەڤ بەشا بنرخ، ستراتەژیک و ژیانی یا ھەری گرینگ بوو. ژ بەر کو ھەر کەسی ئیرادەیا خوە راگھاند.”
سڕی سورەییا ئۆندەر د وەشانا زندی دە رەوشا ھەیی یا دەربارێ پێڤاژۆیا کو سەرۆکێ گشتی یێ مەھەپێ دەولەت باخچەلی دایە دەستپێکرن دە گۆت: ژ بۆ پێڤاژۆیێ چ شەرت و مەرج نینە. ئەز ژ وە رە پشتراست دکم کو ژ بۆ ڤێ یەکێ چ بازار و مەرج نینە. ژ نھا و پێ ڤە دێ چ ببە؟ ژ بۆ پێڤاژۆ ژ نھا و پێ ڤە بمەشە پێویستی ب ئاموورێن تەکنیکی، بنەسازیێ، یاسایی و سیاسی ھەیە. ئەڤ نە شەرتێن ڤێ پێڤاژۆیێ نە، لێ پێویستیەکن. ئەم ڤی وەلاتی پارچە ناکن، رێکێ نەدن پارچە ببە.”
ھەر وھا ژ ئۆندەر ھات پرسین کو د بانگا چەکان یا کو ژ پەکەکێ ھاتیە کرن دە یەپەگە ژی ھەیە یان نا. ئۆندەر گۆت، “د پرەنسیبێ دە ھەر کەسی دگرە ناڤا خوە. ئەڤ ئیرادە ھاتیە راگهاندن. وەرن ئەم ب ھەڤ رە باخڤن، ل سەر چ ھەرێمان ئەڤ ئیرادە وێ چاوا پێک وەرە و بگھێژن جھەکی. ب گرانی پەکەکێ دگرە ناڤا خوە، ھەلبەت. ئەڤ سازیا بنگەھینە، ئاڤاھیەکە کو پەکەکێ ئاڤا کریە.”
