هەڤسەرۆکا گشتی یا دەم پارتیێ داخوازا راوەستاندنا ئۆپەراسیۆنێن ئارتێشا ترکیەیێ کر، دا کو په‌كه‌كه کۆنگرەیا خوە لدار بخە و پەیاما ئۆجالان بجهـ بینە.
هەڤسەرۆکا گشتی یا دەم پارتیێ تولای هاتیمۆگووڵار ئیرۆ 4ێ ئادارێ د ئیڤێنتا کۆما ژنان یا پارتیا خوە دە ئاخڤی و گۆت: «ئەم سپاسیا سەرۆک بارزانی و هەموو سەرکردایەتیا سیاسی یا هەرێما کوردستانێ دکن ژ بۆ پشتەڤانیا وان، ئەڤ ژ بۆ یەکتیا نەتەوەیی یا گەلێ کورد و ئاشتیێ پشتگریەکە گەلەک مەزنە».
هاتیمۆگووڵار گۆت: «په‌كه‌كێ ب داخویانیەکێ راگهاند کو ئەوێ ل گۆری بانگا ئۆجالان تەڤبگەرن. ڤێ بانگێ و راگهاندنا ئاگربەستێ هێڤیا مە یا ئاشتیێ گەلەک مەزن کر. ژ بۆ کو ئەڤ هێڤی مایندە ببە و ژ بۆ په‌كه‌كه بکارە کۆنگرەیا خوە لدار بخە، دڤێ دەملدەست زەمینا شەر ژ هۆلێ وەرە راکرن. دڤێ ئۆپەراسیۆنێن دەرڤەیی سینۆر بێن سەکناندن».
هەروها هەڤسەرۆکا گشتی یا دەم پارتیێ گۆت: «گەلەکی گرینگە کو برێز ئەردۆگان ل ڤێ پێڤاژۆیێ خوەدی دەردکەڤە. تەنێ ئاخافتن تێرا دەمۆکراسیا ترکیەیێ و پێکئانینا ئاشتیێ ناکە. چالاکی و پراكتیک تێ خوەستن».
شاندەیا ئیمرالیێ یا دەم پارتیێ رۆژا 27ێ سباتێ بۆ جارا سێیەمین ل گرتیگەها گراڤا ئیمرالیێ ب رێبەرێ په‌كه‌كێ ئابدوڵاهـ ئۆجالان رە هەڤدیتن کر و پشترە ژی د کۆنفەرانسەکە رۆژنامەڤانی بانگا ئۆجالان ژ رایا گشتی رە راگهاند.
ئۆجالان د بانگا خوە دە داخوازا چەکدانینێ ل په‌كه‌كێ کر و هەروها داخواز کر ژی کو په‌كه‌كه کۆنگرەیا خوە لدار بخە و خوە تێ دە هلوەشینە.
کۆمیتەیا رێڤەبەرا په‌كه‌كێ ل 1ێ ئادارێ ل سەر بانگا ئابدوڵاهـ ئۆجالان، ئاگربەست راگهاند. دەربارێ داخوازا ئۆجالان یا هلوەشاندنا پارتیێ ژی، په‌كه‌كێ گۆت: «دڤێ ئۆجالان ب خوە کۆنگرەیا هلوەشاندنێ برێڤە ببە».
