پارلامەنتەر و هەڤسەرۆکێن شارەدارانێن دەم پارتیی ل سەر بانگا رێبەرێ په‌كه‌كێ عه‌بدوللا ئۆجالان جڤیان.
رێبەرێ گرتییێ په‌كه‌كێ عه‌بدوللا ئۆجالان 27ێ سباتا 2025ان بانگا چەکدانین و فەسخکرنێ ل په‌كه‌كێ کر.
کۆمیتەیا برێڤەبرا په‌كه‌كێ ژی 1ێ ئادارێ ل سەر بانگا ئۆجالان داخویانیەک بەلاڤ کر و راگهاند کو ئەو دێ گرێدایی بانگا ئۆجالان ببن و ل گۆری پێویستیێن وێ تەڤبگەرن.
پارلامەنتەر و هەڤسەرۆکێن شارەدارانێن دەم پارتیی ب بەشداریا هەڤسەرۆکێن پارتیێ تونجەر باکرهان و تولای هاتمۆگوڵاریێ ئیرۆ ل ئەنقەرەیا پایتەختا ترکیەیێ جڤیان.
رۆژەڤا سەرەکە یا جڤینێ ژی «بانگا ئاشتی و جڤاکا دەمۆکراتیک» یا رێبەرێ په‌كه‌كێ عه‌بدوللا ئۆجالان بوو.
دەم پارتیێ پشتی بانگا ئۆجالان جڤینێن خوەیێن ل گەل رێخستنێن خوەیێن باژاران، پارلامەنتەر، هەڤسەرۆکێن شارەداریان و ئەندامێن خوە زێدە کرنە.
تێ گۆتن کو دەم پارتی پشتی جڤینێن ناڤخوەیی دێ ژ 9ێ ئادارێ هەتا 15ێ ئادارا 2025ان هەری کێم ل 100 ناڤەندێن جودا یێن ترکیە و باکورێ کوردستانێ ب خەلکێ رە هەڤدیتنان بکە و و دەربارێ پێڤاژۆیا نوو زانیاریان بدە رایا گشتی.
