هه‌سه‌دێ دا زانین، ئارتێشا ترکیەیێ و گرووپێن چەکدار یێن سەر ب وێ ڤە دوهـ ژی ل بەنداڤا تشرین و پرا قەرەقۆزاقێ گەلەک ئێرش کرنە و د بەرسڤا ئێرشان دە، لەشکەرەکی و 2 چەکدار هاتن کوشتن.
ناڤەندا راگهاندنێ یا هه‌سه‌دێ ئیرۆ 6ێ ئادارێ د داخویانیەکێ دە راگهاند، 3 مەهن ل پەی هەڤ ئارتێشا ترکیەیێ و چەکدارێن سەر ب وێ ڤە ئێرشێن خوە ل سەر هەرێمێن ناڤچەیێن هه‌سه‌دێ زێدە کرنە.
دیار کر ژی، شەرڤانێن هه‌سه‌دێ دوهـ ل گوندەوارێن باکورێ بەنداڤا تشرینێ درۆنەکە خوەکوژا چەکداران خستە خوارێ. هەروها چالاکیەک ل دژی کۆمەکە چەکدار پێک ئانی و د ئەنجامێ دە چەکدارەک هات کوشتن.
ل گۆری داخویانیا هه‌سه‌دێ، ل ئەنیا دێر هافرێ؛ شەرڤانێن هه‌سه‌دێ هەولدانەکە چەکداران یا کەتنا ئەنیێ تێک بر و چەکدارەک هات کوشتن.
ل ئەنیا رۆژئاڤایێ کۆبانێ؛ فرۆکەیێن شەر یێن ترکیەیێ مەزرەیا مونیر حەبیبی بۆمبەباران کر. د ئەنجامێ دە زرار ل باخ و باخچەیێن سڤیلان بوون. هەروها درۆنێن ترکیەیێ ل ئاسمانێ هەرێمێ دگەریان.
ل ئەنیا قەرەقۆزاقێ و باشوورێ کۆبانێ؛ فرۆکەیێن شەرێن گوندێن خەسەق و مەلحا بۆمبەباران کرن. ژ بەر بۆمبەبارانێ زرارێن مادی چێبوون.
ناڤەندا راگهاندنێ یا هه‌سه‌دێ بەلاڤ کر ژی، ل هەمبەری ڤان ئێرشان ژی هێزێن هه‌سه‌دێ ل گرێ قەرەقۆزاقێ چالاکیەک کر و د ئەنجامێ دە لەشکەرەکی ترکیەیێ هات کوشتن و 4 ژی بریندار بوون.
