وەکە تێ دیتن، ژبەر شکەستنێن بەردەوام ل همبەر ترکیەیێ، پەکەکێ ته‌ڤگه‌را چه‌كدارێن خوه ڤه‌گوهه‌ستیه ده‌ردوورا گوندێن دهۆكێ، ب ڤێ سه‌ده‌مێ ده‌وله‌تا ترك د دەما 9 رۆژێن دەرباسبوویی دە هەژمارەکە هەری زێدە یا گوند، گه‌لی و ده‌ڤه‌رێن دیار یێن دهۆكێ بۆردۆمان كرنه و ب سه‌دان مووشه‌ك لێ باراندنه. ڤان ئێریشان زرارێن هه‌ری مه‌زن ب خوه‌زایا هه‌رێمێ و شێنیێن گوندان خستیه.
جیهێن هاتین بۆمبەبارانکرن ئەڤن:
1/3/2025
دەمژمێر 12:27 شەڤێ، فرۆکەیێن لەشکەرێ تونەلا پەکەکێ یا دکەڤە چیایێ مەتینا ل هنداڤی گوندێ گوهەرزێ بۆمبەباران کر.
5:55 هەیانی 6:00 مەغرەب، لەشکەرێ ترکیێ پشتا بەنداڤا سەرگەلێ و سگێرا کەڤن یێن سەر ب دەڤەرا نهێلێ ڤە بۆمبەباران کرن.
2/3/2025
دەمژمێر 12:20 شەڤێ، بالافرێن شەر یێن ترکیەیێ ئاقارێ گوندێ بەلاڤەیا کەڤن بۆمبەباران کریە.
6/3/2025
دەمژمێر 12:05 شەڤێ، بالافرێن شەر یێن ترکیەیێ گەلیێ بازێ یێ سەر ب دەڤەرا بەرواری بالا ڤە بۆمبەباران کریە.
دەمژمێر 10:05 شەڤێ، لەشکەرێ ترکیێ گوندێ قومریا کەڤن یێ سەر ب دەڤەرا بەرواری بالا ڤە بۆمبەباران کریە.
7/3/2025
دەمژمێر 1:00 شەڤێ، بالافرێن شەر یێن ترکیەیێ پشتا گوندێ رەزیکا کەڤن و سەرێ دەریێ بییێ یێن سەر ب دەڤەرا بەرێ گارێ ڤە بۆمبەباران کرینە.
دەمژمێر 1:06 شەڤێ، بالافرێن شەر یێن ترکیەیێ گەلیێ گوندێ بازێ، هەر وەها پشتا گوندێ سەرەروو یێن سەر ب دەڤەرا بەرواری بالا ڤە بۆمبەباران کرن.
8/3/2025
دەمژمێر 12:00 نیڤرۆ، فرۆکەیێن لەشکەرێ ترکیەیێ گەلیێ گوندێ کانی مازێ بۆمبەباران کریە.
دەمژمێر 11:34 شەڤێ فرۆکەیێن لەشکەرێ ترکیەیێ گەلیێ گوندێ بازێ بۆمبەباران کریە.
9/3/2025
دەمژمێر 2:23 هەیانی 2:25 نیڤرۆ، ترکیەیێ گوندێ مژێ و کەڤنە مژێ یێن سەر ب دەڤەرا بەرێ گارێ ڤە بۆمبەباران کریە.
ژ خزیرانا سالا رابووری ڤە ئارتێشا تركیێ قووناغه‌كه نوو ژ ئۆپه‌راسیۆنا په‌نجه ل دژی په‌كه‌كێ ل باشوورێ كوردستانێ ده‌ستپێكریە و رۆژانه گوندێن دهۆكێ د ڤێ ئۆپه‌راسیۆنێ ده تێن بۆردومان كرن.
ل داوییا سالا 2024 سه‌رۆككۆمارێ تركیێ ره‌جه‌ب تاییب ئاردۆگان گۆت كو ئه‌وێ ل سالا نوو ئێریشێن خوه یێن ب باندۆر ل دژی په‌كه‌كێ ل هه‌ر ده‌رێ ده‌وام بكن، لوما ژی ژ ده‌ستپێكا سالا نوو ڤه ئارتێشا تركیێ دیسا ئێریشێن هه‌وایی یێن ل دژی په‌كه‌كێ ل باشوورێ كوردستانێ دژوار كرنه و د 9 رۆژێن داوین ده ب ده‌هان جاران ئێریشی گوندێن دهۆكێ كرییه.
