فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عه‌بدی و سەرۆکێ قۆناغا ڤەگوهێز یا سووریەیێ ئه‌حمه‌د شه‌رع رێکەفتنا تەڤلیکرنا هه‌سه‌دێ د ناڤا سازیێن دەولەتا سووریەیێ دە ئیمزەکرن.
ئاژانسا «سانا» یا فەرمی یا سووریەیێ بەلاڤ کر، ئه‌حمه‌د شه‌رع و مەزلووم عه‌بدی ئیرۆ 10ێ ئادارێ رێکەفتنەک ژ 8 خالان پێک تێ ئیمزە کرن و تێ دە تەکەزی ل سەر یەکپەرچەیییا خاکا سووریەیێ، تەڤلیبوونا هێزێن هه‌سه‌دێ د ناڤا سازیێن دەولەتێ دە و ئاگربەستێ کرن.
خالێن رێکەفتنێ:
1- گارانتیکرنا مافێن هەموو سووریان ژ بۆ نوونەراتی و بەشداریا وان د پرۆسەیا سیاسی و هەموو دەزگەهێن دەولەتێ دە، ل سەر بنگەها ژێهاتیبوونا وان، بێیی جوداهیا ئۆلی و نەتەوەیی.
2- جڤاکا کوردی، جڤاکەکە رەسەنە د دەولەتا سووریەیێ دە و دەولەتا سووریەیێ مافێ وێ یێ وەلاتیبوونێ و هەموو مافێن وێ یێن دەستووری گارانتی دکە.
3- ئاگربەست ل سەرانسەری هەرێمێن سووریەیێ.
4- هەموو سازیێن سڤیل و لەشکەری یێن باکورێ رۆژهلاتێ سووریەیێ تەڤلی رێڤەبەریا دەولەتا سووریەیێ تێن کرن، د ناڤ دە دەریێن سینۆر، فرۆکەخانە و کێلگەهێن پەترۆل و گازێ.
5- گارانتیکرنا ڤەگەرا هەموو کۆچبەرێن سووری بۆ باژارۆک و گوندێن خوە و مسۆگەرکرنا پاراستنا وان ژ ئالیێ دەولەتا سووریەیێ ڤە.
6- پشتگریا دەولەتا سووریەیێ د شەرێ وێ یێ ل دژی پاشماهیێن ئەسەد و هەموو مەترسیێن ل سەر ئەولەهی و یەکیتیا وێ.
7- رەدکرنا بانگێن پارچەبوونێ، ئاخافتنێن نەفرەتێ و هەولدانێن بەلاڤکرنا فتنەیێ د ناڤبەرا هەموو پێکهاتەیێن جڤاکا سووریەیێ دە.
8- کۆمیتەیێن جیبجیکار کار دکن و هەول ددن کو رێکەفتنێ جبجی دکن، ب ئاوایەکی کو داویا سالێ دەرباس نەکە.
