سالح موسلم: پەیمانا ل شامێ ھاتیە ئیمزەکرن ل گۆری نامەیا ئۆجالانە

بەردەڤکێ پەیوەندیێن دەرڤە یێ پەیەدێ دیار کر، رێکەفتنا ئەحمەد شەرع و مەزلووم عەبدی لگەل پەیاما عەبدوللاھ ئۆجالان دگونجە.

بەردەڤکێ پەیوەندیێن کارێن دەرڤە یێ پارتیا یەکتیا دەمۆکراتیک (پەیەدێ) سالح موسلم ل سەر رێکەفتنا د ناڤبەرا فەرماندارێ گشتی یێ ھەسەدێ مەزلووم عەبدی و سەرۆکێ قۆناغا ڤەگوھێزا سووریەیێ ئەحمەد شەرع دە، کو دوھ 10 ئادارێ ل شامێ پێک ھات، دیار کر کو ئەو نە ل دەرڤەیی گۆتنێن نامەیا عەبدوللاھ ئۆجالان دە نە.

سالح موسلم دا زانین، نامەیا ئۆجالان ژ بۆ رێڤەبەریا خوەسەر ھات. د وێ نامەیێ دە تشتێ ھاتیە دیارکرن، ئەو د رێیەک راست دە نە. ئەوێ ببن پارچەیەک ژ سووریەیێ و گۆت: “ئەم نە ل دەرڤەیی گۆتنێن د وێ نامەیێ دە نە. ب کورتی ئەم د خالێن کو رێبەرتی دیار کرنە دە دچن.”

ھەروھا گۆت: “ھەلبەت ب شەرتێ پاراستنا ئازادی و مافێن خوە، ئەم دێ جھێ خوە د ناڤا ڤێ دەولەتێ دە بگرن. ژ خوە ژ دەستپێکێ ڤە مە ئەڤ یەک ئانی زمان و ل گۆری وێ ئەم تەڤگەریان.”

بەردەڤکێ تێکلیێن دەرڤە یێ پەیەێ تەکەز کر، “ئەم پارچەیەک ژ سووریەیێ نە و ئەم دخوازین ب ھەڤ را بژین. ئەم دخوازین ئازادیا خوە بپارێزین. ئەڤ ھەموو ژی د پەیمانا کو ھاتیە ئیمزەکرن دە، ھەیە.”

سەرۆکاتیا سووریەیێ دوھ 10 ئادارا 2025 بەلاڤ کر، سەرۆکێ قۆناغا ڤەگوھێزا سووریەیێ ئەحمەد شەرع و فەرماندارێ گشتییێ ھێزێن سووریەیا دەمۆکراتیک (ھەسەدێ) مەزلووم عەبدی رێکەفتنەک ژ 8 خالان پێک تێ ئیمزە کرن. تێ دە تەکەزی ل سەر یەکپەرچەیییا خاکا سووریەیێ، تەڤلیبوونا ھێزێن ھەسەدێ د ناڤا سازیێن دەولەتێ دە و ئاگربەستێ ھات کرن.

خالێن رێکەفتنا ئەحمەد شەرع و مەزلووم عەبدی:

1- گارانتیکرنا مافێن هەموو سووریان ژ بۆ نوونەراتی و بەشداریا وان د پرۆسەیا سیاسی و هەموو دەزگەهێن دەولەتێ دە، ل سەر بنگەها ژێهاتیبوونا وان، بێیی جوداهیا ئۆلی و نەتەوەیی.

2- جڤاکا کوردی، جڤاکەکە رەسەنە د دەولەتا سووریەیێ دە و دەولەتا سووریەیێ مافێ وێ یێ وەلاتیبوونێ و هەموو مافێن وێ یێن دەستووری گارانتی دکە.

3- ئاگربەست ل سەرانسەری هەرێمێن سووریەیێ.

4- هەموو سازیێن سڤیل و لەشکەری یێن باکورێ رۆژهلاتێ سووریەیێ تەڤلی رێڤەبەریا دەولەتا سووریەیێ تێن کرن، د ناڤ دە دەریێن سینۆر، فرۆکەخانە و کێلگەهێن پەترۆل و گازێ.

5- گارانتیکرنا ڤەگەرا هەموو کۆچبەرێن سووری بۆ باژارۆک و گوندێن خوە و مسۆگەرکرنا پاراستنا وان ژ ئالیێ دەولەتا سووریەیێ ڤە.

6- پشتگریا دەولەتا سووریەیێ د شەرێ وێ یێ ل دژی پاشماهیێن ئەسەد و هەموو مەترسیێن ل سەر ئەولەهی و یەکیتیا وێ.

7- رەدکرنا بانگێن پارچەبوونێ، ئاخافتنێن نەفرەتێ و هەولدانێن بەلاڤکرنا فتنەیێ د ناڤبەرا هەموو پێکهاتەیێن جڤاکا سووریەیێ دە.

8- کۆمیتەیێن جیبجیکار کار دکن و هەول ددن کو رێکەفتنێ جبجی دکن، ب ئاوایەکی کو داویا سالێ دەرباس نەکە.